格拉沙入主曼聯後，搞到「紅魔」天翻地覆，一時話關水喉，一時又傳會賣奧脫福球場甚至用個球場打美式足球，死未？
唔止曼聯fans嬲，曼聯球員亦一樣唔高興，盛傳隊長堅尼將會帶頭搞對抗，來季首課操練隨時會同隊友一齊自動消失，大家一於擔定櫈仔等睇好戲。
講真，曼聯呢個夏天要南征北討搵銀、練兵，之後重要踢歐冠盃外圍賽，球員個假期比平時短，如果你話堅尼帶頭唔操首課，肯定一呼百應。
其實唔止堅尼，軒斯亦用批評口脗向格拉沙發炮，話到呢刻為止都唔知新老細想點，如果新領導層係為球會好，就應該盡快有個清晰發展方向。
軒斯不嬲敢言，第一季踢曼聯亦交足貨有餘，呢次敢寸老細為球迷出氣，曼聯躉唔更鍾意佢至奇。
話時話，球員就開始有所動作，反而領隊費格遜就無咩動靜，唔知一旦班球員真係搞對抗嘅話，「費爵爺」立場會點呢？