提起可樂，問十個可能有九個鍾意飲。但當中可能只有一個半個鍾意儲可樂的周邊產品。儲可樂的，又會因為屋企面積小而把收藏品進行密集式不見天日的堆堆叠叠。儲了成2,000件可樂嘢的Sunny就順勢將屋企變成紅白色，凡紅白家具一望就知用來放可樂或者同可樂有關，為了保持一貫風格及色調，「入住者」重要嚴守規矩，非紅白色請自律收到眼不見之處！
記者：梁彩燕 攝影：陳陶鈞
設計公司：SpaceDesign（27132973）
着住可樂Tee的Sunny自言一向同紅色有緣：「本身已很喜歡紅色，又鍾意可樂嘢，甚至讀書時的學校Team衫，自己喜歡的球隊（阿仙奴）都係紅色，可能真係有緣啩！」所以結婚後同太太Maggie擁有自己天地，都要做到一屋紅白。要紅白，當然因為想要襯番可樂的形象！另外木製家具要做到外表有塑膠感、要光身要令面，所有家具要圓角，亦要飯廳設有一邊卡座的設計，起碼咁先叫貫徹番整個Tone。
可樂終可見天日
儲可樂儲了十幾年的Sunny由搖搖同鋁罐開始，到現今有成2,000件可樂產品咁大規模，各地可樂、CDPlayer、雪櫃、足球擺設甚至廣告牌乜都有。但以前儲得多都只可以一箱箱放入櫃放入床下底，𠵱家終於有機會重見天日，客飯廳和書房的飾櫃、組合櫃都專為放可樂而設，連Sunny都笑說：「所以多需要些真正用來儲物的空間！」
Show珍藏
地台層板抽屜玩隱身
全屋凡是紅白色的儲物櫃都用作擺放可樂了，真要多想點辦法來騰出更多空間不可。所以近年極為流行的提升地台、床板底部和雜誌架儲物櫃兩用的設計絕不能缺。
兩書房風格截然不同
Sunny和Maggie各自擁有自己的工作房，但兩房風格卻大相逕庭。Sunny當然照玩紅白，又是勁多可樂；而Maggie房則木色較多，感覺沉實穩重，但原因只為襯番座鋼琴！走進男主人書房，行近書枱會發現枱上竟有可樂足球場！原來是因為貼近窗台的書枱與組合櫃之間的牆角出現了「死位」，這裏當然可做一個頂揭式的儲物格，但現在安裝成Display櫃，工作悶了望幾眼心愛玩意，係咪會特別醒神？
Sunny書房
Maggie書房
Maggie書房實用性較強，木色作主調皆因為襯托鋼琴而設。
地區：新元朗中心
面積：780呎
間隔：3房2廳
裝修連家具費：$250,000
Sunny心得：透明膠片作掩飾
很多居室的走廊位都設有假天花，作用可遮蓋橫樑之餘，若走廊掛有相片或掛畫，加裝一兩盞小射燈更有畫龍點睛之效。
若不想大搞花臣，也可學Sunny，不用裝上任何燈光，而將假天花換上兩塊透明紅膠片，掛點可樂小吊飾，也可做到調色及點綴的作用。
大半年尋心水茶几
Sunny全屋九成家具均為訂製，但專用來放可樂雪櫃仔及閃燈裝飾的茶几卻是G.O.D.貨色，「因為那可樂閃燈不想多花工夫安裝上牆，一心想買個白色櫃仔，但走遍港九新界家具店都找不到可以Match到全屋Style的心水款式，到裝修搞好可以入伙了，總共用上大半年時間，思前想後，最終買下這個G.O.D.茶几。」可真用心良苦。
