星期三黃昏，喺大馬路等的士去馬場，每逢呢個時候，的士數量特別少，例牌要在路邊罰企幾分鐘，相熟報販問：「老細，今晚有乜心水？」心水就係七場二號，人壽保險天王黃偉慶老爺嗰隻「成功皇」，馬主Ｎ一早打電話嚟叫左丁山買七場二號，按理冇得輸喎。就係輸咗，只跑第三啫，頭兩名係「千禧之光」與「嘉嘉贏」。不過「千禧之光」嘅馬主杜達輝同是香江獅子會獅兄弟，又同是新亞書院校董，邊個贏都冇所謂啦。左丁山就係憑佢兩人嘅私交投注，中番條位置Ｑ，有八倍，算好分咯。
講番報販，佢問完心水就要求左丁山向曾未來特首抗議，點解佢唔畀港台播馬，報販說：「我哋成班老友聽港台播馬，聽咗三十年，你知啦，我哋要睇檔，日馬唔入得場，靠聽港台嚟打電話落注，冇咗播馬點得呀？我哋要抗議呀！」大家都係一介蟻民，有乜資格抗議呀？大人物一言九鼎，港台唔轉播賽馬，咪聽商台囉！
報販話：「你聽得少，有所不知，我哋鍾意港台冇廣告，講馬一口氣直落，聽商台就窒吓窒吓，唔夠十分鐘就去廣告，好冇癮吖嘛，我試過聽聽吓張福元，佢一賣廣告就轉番去聽馬恩賜，試過幾次，覺得好唔方便，就鎖定港台唔郁。曾蔭權日日上教堂，係正人君子，不貪不賭，但我哋鍾意發橫財、鍾意賭馬喎，唔畀呀，佢有乜好理由唔畀港台講馬先？」
曾蔭權冇話唔畀，只係話唔鍾意啫，但他日佢身為特首，位高權重，朱培慶會唔會唔聽話，敢膽繼續播馬呀？大家有疑問。如果第日有個特首話唔喜歡港台轉播BBC，唔喜歡第四台播古典音樂嘅話，廣播處處長會唔會「體會領袖芳心」呀？
有的士到，左丁山一個箭步跳上的士，報販在後面嗌：「不如流放朱培慶去東京，搵人搞掂港台啦！」