關之琳前晚在上海出席一間法國珠寶店開幕時，雖然戴住價值三百萬人民幣的鑽飾，着住斜膊泰山裝出場，但風頭卻被着大低胸裝的周汶錡蓋過。
關之琳、周汶錡、孟廣美和秦海璐前晚在上海外灘出席一間法國珠寶旗艦店Boucheron開幕，關之琳頭戴一頂綠色蝴蝶皇冠，連一對耳環共值三百萬人民幣，不過一身斜膊泰山裝的關之琳卻被周汶錡的deepV裙搶晒鏡，可以說是始料不及。
鑽冠逾百年歷史
關之琳表示所戴的鑽冠曾被約旦皇后戴過，有百多年歷史，她說：「我都鍾意買古董鑽飾，不過唔係成日有機會戴，所以唔會用咁貴價錢買呢啲嘢玩，但平時都會去歐洲買啲classic嘅古董首飾。」關之琳又透露她在拍攝上海一個保暖內衣廣告後，今日便返港，所以不會出席上海電影節的活動。
周汶錡被問到其低胸晚裝搶晒關之琳鏡時只笑而不語，她說：「我唔清楚戴嘅頸鏈值幾多錢，平時都有儲首飾嘅習慣，我覺得鑽飾要自己買先至名貴。我打算七月尾去美國或者英國讀珠寶設計，我向來鍾意設計，已經有晒概念，希望第日有機會出自己嘅品牌。」
周汶錡又表示即將推出介紹台灣的旅遊書，所以近來十分忙碌，遲些還打算推出關於香港和日本的旅遊書，而現時已較少行騷的她就希望作多些其他方面的發展。
心如遭抓傷痛哭
此外，近日上海不斷舉行大型活動，林心如昨日就在上海出席電視節展覽開幕禮，但由於現場圍觀者眾，當影迷發現林心如時，為爭睹其風采，一度造成混亂，心急的影迷竟然抓傷她的肩膊，痛得林心如尖叫起來更當場落淚，最後要勞動保安護送離開。
採訪、攝影：曾小嘉
