眼見喺日本，飄移甩尾已經差唔多成為一項正規運動，但一眾香港甩尾友真係得個恨字！由於香港無一個合法的甩尾場，呢班甩尾發燒友惟有用車會名義上珠海搞慈善表演，目的就係為咗畀香港市民一個正面形象，希望唔使再偷偷摸摸，可以好似拓海一樣，喺大家的掌聲、讚賞聲下甩到出煙、Drift到「呃呃」聲。
記者：馬慶武
攝影：林栢鈞、部份相片由TypeRClubDriftTeam提供
飄移4大動作
唔係非法賽車
香港未有賽車場，喺空地、停車場玩甩尾又俾人投訴、俾警察驅趕，所以一眾TypeRClubDriftTeam嘅飄移發燒友只可以喺一啲慈善表演場合大顯身手。上年佢哋就申請到喺白石表演為「奧比斯」籌款，會長James話：「嗰次吸引到幾千人嚟睇，好開心！嚟緊都會同SportForLife呢個慈善團體合作搞飄移表演，希望多啲人認識！其實飄移係運動，實在唔可以同非法賽車混為一談！」
上珠海過手癮
要表演？就要練習！James話，最正就係上珠海車場放盡狂甩狂飄，平時手痕點算？「惟有夜麻麻去啲冇人嘅空地停車場過吓手癮囉，不過……其實……應該𠵱家唔會去㗎喇，都係上珠海安全啲！」James重話佢個車會有醫生、律師、上市公司CEO等專業人士會員，最希望可以喺香港搵到地方合法玩飄移，政府就算唔起個賽車場，都畫笪地俾佢哋玩吓咁話。
TypeRClubDriftTeam（23892532）
珠海甩尾飄移團：費用約$9,800，包汽車運費、食宿及賽車場落場費用。
6月19日白石推廣活動：鍾意玩車睇車嘅朋友都歡迎到場，當日會選出兩位年輕車手作日後重點培訓。
甩尾唔算犯法！
現時香港並無法例管制車輛不可以在橫滑狀態下行駛（甩尾），只要你無非法改裝、唔超速、唔Cut雙白線，依足交通規則，基本上玩甩尾唔算犯法。
不過在某些特定情況下，例如當警方發現駕駛者有可能危害其他道路使用者，可能會控告你不小心駕駛，最高刑罰扣5分，兼有機會被罰款。
甩尾勁車晒冷
車主：WingLo
職業：商人
飄移資歷：7年
飄移戰車：富士ImperzaWRXSTi
全港唯一一架尾轆版WRX，用咗兩萬幾蚊由四驅改為兩驅，全因想玩甩尾！
車主：Kent
職業：貿易商人
飄移資歷：半年
飄移戰車：日產S14
本身揸AudiA4旅行車代步，呢部後驅S14係為咗玩甩尾飄移而買。
車主：Keith
職業：醫療界
飄移資歷：半年
飄移戰車：日產S15
唔贊成車迷喺街飛車，卻認為喺賽車場玩飄移係一項安全兼可提高駕駛技術的運動。
港玩甩尾熱點
TypeRClubDriftTeam鼓勵車迷上珠海玩飄移，但香港其實都重有好多人靜靜雞搵地方玩。以下介紹嘅就係甩尾響胎熱點，不過據講呢排捉得勁緊，就算入到去，玩一陣都會俾鐵馬趕走，所以都係叠埋心水上珠海穩陣！
地點1：將軍澳工業邨停車場
地點２：西貢大清停車場
地點３：白石高爾夫球場