橫睇掂睇搞嘢直角轉芒

𠵱家好多人屋企都有一部Plasma，有冇諗過手機上面都可以有Plasma呢？SAMSUNG最近出咗一部SGH-Z130，個芒可以90度扭轉，一下子就變成一個橫度芒，簡直係一部縮細咗嘅Plasma，直身機上面絕對首見，支援3G網絡之餘，功能上面亦都唔弱，有外形得嚟重好有內涵㖭！

記者：梁瑋瑜　攝影：朱崇德
ImageGirl：Joey

Profile

網絡制式：WCDMA/GSM900/1800/1900
通話時間：3小時
待機時間：180小時
記憶體：53MB
鈴聲：64和弦/MP3/AAC
尺寸：112×46×20mm
重量：120g

$3,780(a)

睇片傾視像　橫行無忌

驟眼睇落去，SGH-Z130同SAMSUNG一貫嘅直身手機分別唔大，重要用埋SAMSUNG例牌嘅深藍色，真係估佢唔到原來螢幕部份可以逆時針扭90o，令普通一個手機直芒，驟眼變成一個橫度芒；可能你會話，一般扭芒手機都可以橫向顯示啦！其實大多數扭芒手機喺橫度狀態嘅時候只可以用嚟影相，唔可以進行其他操作，更加唔可以通話！SGH-Z130特別嘅地方就係打橫咗個芒之後，用家仍然可以進行視像通話，最重要嘅係，大家可以用呢個芒嚟影相同埋播片，觀感上梗係好好多，1.5"嘅螢幕雖然唔可以話好大，但係解像度有成220×176，加上26萬色，顏色非常之鮮明同埋細緻，有咗佢，唔使帶部PMP出街都有靚片睇啦！

■無論係數字掣定上面嘅操作掣都好好㩒。

■內置遊戲一般，但都算幾好玩！

■輕輕咁向逆時針方向一扭，直芒即刻變橫芒。

自拍外拍　旋動式鏡頭

睇部機嘅正面雖然見唔到個鏡頭，但係大家唔使擔心，SGH-Z130嘅鏡頭其實收埋咗喺芒後面機頂部份，只要扭開個芒就會見到，呢個鏡頭同個芒一樣又係可以扭嘅，自拍又得，傾視像又得，反番轉佢拍人又得，自由度好大，雖然係直身機，用起上嚟都冇乜限制，呢個設計真係唔錯。
不過鏡頭可轉動部份比較細小，大家要小心轉嘅時候會整污糟個鏡頭呀！SGH-Z130嘅鏡頭有130萬像素，最高解像度係1,152×864，鏡頭旁邊有補光燈，黑麻麻嘅時候影相都冇問題，有唔同嘅相框同埋拍攝效果可以玩吓，如果影嘅時候㩒唔切，都重可以喺手機上面加番後期工夫，效果一樣咁出色！

■芒又可以扭，鏡又可以扭，呢部機都真係經典！

■鏡頭喺機頂部份，可以作270度轉動。

■相片嘅解像度最高有1,152×864，都算唔錯。

■後期加工都可以變單色或者加圖框，效果重好好㖭！

53MB「內記」　唔插卡

SGH-Z130重有短片拍攝功能，拍成3GP格式嘅影片，喺手機上面睇番都算幾流暢，暗位幾清晰，起格情況亦唔係好嚴重。至於多媒體功能方面，呢部機支援MP3同AAC格式嘅音樂檔案，內置嘅音樂播放器介面好靚，操作亦都好方便，另外又支援常用嘅MPEG4短片檔案，大家唔使擔心轉格式嘅問題啦。
SGH-Z130多媒體功能十分齊全，不過唔可以插記憶卡就始終冇咁方便，好彩有53MB記憶體，同埋可以用藍芽嚟傳送檔案，都算係彌補咗冇記憶卡嘅不足！

■播歌介面好靚，聽歌都聽得開心啲。

■可以用藍芽連接其他裝置，SAMSUNG機中好難得。

■跟機嘅耳筒都好靚仔，似足MP3機質素。

■唔想用耳筒可以用機後面嘅喇叭嚟播歌，音質唔錯。