煲呔噚日撇甩晒啲記者，自己偷偷地去咗九龍灣嘅淘大巡區，順便幫襯淘大商場嘅商戶，佢只係冇好似溫總咁，上埋去民居度抱BB。
有同事同八方講，煲呔噚日去完華仁參加彌撒後，跟住就去咗君悅，曾蔭權競選辦嘅丘福生就同啲行家話，煲呔去君悅食飯，點知有蠱惑，原來入君悅只係放煙幕，煲呔跟住一個屈尾十就轉咗第二架七人車，直奔淘大巡區買嘢。
曾辦事後喺網站發相畀傳媒。不過八方睇到有間報館新聞網站搞錯咗，將資料來源寫咗「政府新聞處」，個網站可能打漏咗字個「前」字，因為幫煲呔搞公關嘅人，大部份都係來自前政府新聞處，呢單嘢可大可小，蔡瑩璧都係澄清吓好。
傳真︰2623-9278
電郵︰[email protected]