因為唱電影《藉著雨點說愛你》嘅主題曲《花》而大紅嘅樂隊ORANGERANGE，最近為電影《電車男》唱嘅抒情歌《LoveParade》連續兩周成為細碟榜冠軍，氣勢如虹嘅ORANGERANGE即時食住上，喺上周推出充滿夏日氣息嘅新歌《求求你！小姐》，新歌MV共有三個版本，其中有個重玩番《電車男》㖭。
上節目遭強吻
ORANGERANGE嘅新歌MV分為三個版本，其中《電車男篇》講一名靚女喺電車上慘遭醉酒佬騷擾，電車男即時英雄救美打走醉酒佬，但轉個頭醉酒佬竟然變身成怪獸，重箍實個女主角唔放，搞到英雄冇晒符。另一個《原宿大件事!!篇》嘅MV內，有幾個幪面大隻佬扮ORANGERANGE喺原宿表演，但就俾歌迷喝倒采，搞到工作人員要即時用紙皮箱送六位正版隊員到場補鑊。
另外，ORANGERANGE上周到諧星松本人志主持嘅音樂節目《HEY!HEY!HEY!》宣傳，其中主音RYO影貼紙相時，慘被SMAP嘅排舞師、日本乸型藝人KABA.chan強吻，搞到佢揦口揦面。