英皇有四位歌手喺今個月生日，分別係容祖兒（Joey）、梁洛施（Isabella）、黃耀明同吳浩康。前晚英皇幫佢哋喺駿景酒店開咗個派對，楊受成夫婦、Boy'Z、鄭希怡、謝霆鋒、蔣雅文同李逸朗等都有出席。Joey話前晚睇完RobinGibb演唱會先嚟，佢話有同Robin合照，不過冇傾偈，重話人哋個樣好似陳奕迅老竇陳裘大喎。
想有兩日假旅行
過咗一陣老闆楊受成都嚟埋，大班記者要求佢哋合照，楊受成扮聽唔到就咁行咗去，搞到Joey好尷尬咁話：「我真係唔受歡迎呀。」Joey話佢收咗歌迷一本好特別嘅字典做生日禮物，而佢重希望收到首飾頸鏈之類嘅嘢，佢又話：「我最鍾意係舊年收到Steven送嘅限量版大富翁。」
Joey今年嘅生日願望係有兩日假去外地玩，同埋做訪問時有多啲嘢講，重有快啲錄完唱片喎，至於愛情，Joey好鬼馬咁話：「冇諗過，你唔問都諗唔起㖭。」Isabella話買咗三份水晶送畀另外三位壽星，佢雖然未夠十八歲，但當晚都飲咗少少酒。