銀行同業拆息大升，舖市大額成交靜晒，事關租金回報冚唔到利息開支，個市唔升長揸都要蝕水，難得代理依然努力不懈，游說業主標售細碼二線舖，等個市有啲郁動。
美記冒住大幅加租嘅風險，叫業主攞土瓜灣北帝街順輝大廈五、六號地舖連天井出嚟招標，夾埋千八呎，一分為三，月租十萬，其中一個由美記租用，隔籬租畀行家環球置業同埋設計公司，七月十八號截標。
時下舖位身價偏高，買家為求合理回報，鍾意玩大幅加租，若然呢幾個舖高價賣出，美記可能難逃加租厄運，分分鐘賺埋啲佣都補唔番。
中記正路少少，搵番近期流行嘅酒樓位招標，北角英皇道新時代廣場一樓，四千六百呎，意向價千九萬，四千一蚊呎，算係平舖之選，七月二十號截標。
電郵地址：[email protected]