【本報訊】「架直升機飛咗三層樓咁高時，突然作九十度向左右不停搖擺，跟住機頭向下機尾向天打咗個轉，當時以為玩緊飛行花式表演！」目擊墜機過程的「波仔」續說：「點知冇幾耐，架機打幾個轉後尾部直插落地，嗰陣時先知出事」。
第一次到北丫海灘游水及燒烤的波仔表示，墜機現場離他燒烤的地方約一百米，自從該直升機飛抵北丫降落後，他覺得很新鮮及好奇，所以一直留意直升機，約十分鐘後他見到直升機垂直起飛，但升到約七米高空時，就左右不停搖擺，波仔說：「我幾個朋友都睇到，架機好似失控係咁打轉，大家重講係咪拍緊戲，有人話係玩花式表演，跟住架機就跌落嚟」。
傷者受驚臉色變青
此時，他們才驚覺是真的發生墜機意外，波仔與其七名同伴及十多名附近村民即時跑過去幫忙救人。「見到架機有少少漏油，雖然無見到有白煙，但都聞到燒燶嘢味！」波仔形容當時情況稱：「見到有一個男人從架機裏拖一個女人出來，機入面重有兩個傷者，好似唔郁得，我哋問需唔需要幫手，機內個女人就話唔使啦，冇幾耐消防同差人就趕到」。
另一名在附近玩水上電單車的目擊者「阿B」稱：「架飛機好似玩模型飛機咁喺空中亂咁轉，跟住就跌落嚟！」事發後他即趕到現場去幫忙救人，他說：「傷者個個面色變得好青，其中機內一個女人驚到全身打冷震，手腳又唔郁得，好多市民想幫手救人，但又唔識點幫，驚整傷佢哋，惟用傘幫傷者遮太陽。」
機師向民航處求助
經常到北丫玩水上活動的阿B透露，每逢周日或假期，經常會見到直升機在附近出沒，有時甚至見到有人坐直升機到上址吃海鮮或游泳，他說：「北丫水清沙幼，簡直是世外桃園。」
墜機中受輕傷而毋須入院的譚先生形容墜機剎那時稱：「直升機上升時感到架機喺空中打幾個圈，隨即向左翻側墜下，幸好當時機上各人都戴咗安全帶，否則不堪設想！」他又說：「當時情況很混亂，事發後機師雖然受咗傷，但仍清醒及即時向民航處求助。」任職航空公司地勤的譚先生表示，昨日是他第一次乘坐直升機，墜機意外是無法預測的，他不會因此而對飛機感到恐懼。
附近北丫村村民黃先生表示，北丫村共有四十戶村民，常住村中只有四戶人家，近兩年常有人駕直升機到該村，村民備受直升機的噪音滋擾，現在又發生墜機意外，他希望政府立例禁止直升機降落北丫村，以免村民安全受到威脅。
