呢期美國漫畫改編電影簡直鋪天蓋地，戲院熱上中嘅《罪惡城》、下星期（16/6）等住上嘅《蝙蝠俠｜｜俠影之謎》，重有今個星期新出嘅《魔界行者》3區DVD！奇洛李維斯今次唔做「救世主」，改行做「煙鏟」驅魔人；穿梭於天堂地獄兩界，一支十字狙魂槍決戰撒旦之子，再加點點黑色幽默，各方面都做得好平衡，難怪可以成為本周最熱賣DVD！
記者：朱崇德
今次《魔界行者》3區DVD共分兩個版本，基本普通版及珍藏版都係行雙碟裝；孖碟電影內容完全一樣，主要差別在於普通版跟碟送天堂?地獄掛門牌或滑鼠墊，而珍藏版就隨碟附送《Hellblazer》原著漫畫一本；記者眼見，發燒級碟迷當然唔使講嘢，珍藏版梗係首選，不過問過一啲實際級玩家，佢哋覺得普通版禮品實際有用啲，無端端整本美國漫畫，追落去又唔係（甚至唔知邊度買），放埋喺碟架又太大本，不過珍藏版始終係珍藏版，隨時清貨，要買就快手。
改編自美國漫畫
好多人都將《HELLBOYS》同《魔》作比較，如果你係《海虎》類「給我戰吧！」《HELLBOYS》當然係首選！《魔》故事改編自DC?Vertigo暢銷漫畫《Hellblazer》，奇洛自小有陰陽眼，親人唔信佢有魔力又對佢百般迫害，最後受唔住產生輕生念頭；2分鐘地獄之旅，興起成為驅魔人的念頭，幾兇猛鬼怪佢都戰勝過，但卻勝不過末期肺癌！原想將功抵過，可惜天堂無門，地獄一大班「親家」正等住佢到臨；最後一件差事，竟然是對抗撒旦之子，生命時鐘已經作出最後倒數，剩下的「時間」又能否扭轉乾坤？
黑色笑話連珠發放
當中人設真係一絕！猶記得大天使加百列出場時，一對亦正亦邪的背翼，睇得大家屏息靜氣；各式蛇蟲鼠蟻炒埋一碟嘅怪人亦甚具創意，不過當中最正者首數係「地獄行」！現實世界突然變成「地獄廢城」，周遭物件化作陣陣灰燼，再加鬼哭神號的音樂，好形象化俾人地獄感受！電影中的黑色笑話頗多，每隔幾分鐘就有一個「黑色」笑位！例如奇洛話要幫「混種惡魔」做臨終禱告、撒旦居然自稱係煙草公司股東，另外重有奇洛同撒旦講Goodbye嘅「上帝」之指啦！故事圓滿扭盡六壬，再加精采人設、畫面、音效，都算得上近年做得相當好嘅驅魔片了。
必睇Bonus從未曝光結局
特別收錄感覺好似幾多，成105分鐘重要另加Disc2上，不過都係大路導演及幕後人員訪問片段、製作特輯、從未播映片段加導演旁述、電影預告片等，較好睇係武器設計剖析，支十字狙魂槍自然係重點啦！但係估唔到奇洛戲中食的香煙，竟然係中國仔「長江」牌！真係幾搞鬼；另外必睇重有刪剪片段，當中最尾一段有從未曝光結局，未睇過點算《魔》之迷。
DVDPro（23326326）
地址：旺角奶路臣街6E德發商場地庫B4舖
