應采兒近來先後與林建岳兒子及孫耀威傳出緋聞，她自言不會一腳踏兩船，只是碰巧林公子與她都是由外國返港，故份外投緣。而與她拍劇傳緋聞的孫耀威，她竟笑言覺得對方是屬於八十年代的人。
愛情篇：
年輕拍拖難長久
應采兒和孫耀威因為拍攝亞視劇集《美麗傳說2之星願》傳出緋聞，早前中國星老闆娘向太擺明車馬表示「唔畀應采兒拍拖」，應采兒雖表示尊重公司決定，但卻多次被拍到與孫耀威去街的照片。
藝人情侶容易散
應采兒稱每次和孫耀威單獨去街都被傳媒拍照，感到自己很「黑仔」，她說：「今次因為拍劇傳緋聞，好多人覺得似宣傳。我同佢少咗單獨去街，去親都俾人影，反而一大班人出去就從未試過俾記者影，一單獨就中招。𠵱家少咗見面，拍完劇各有各忙，但大家係好朋友，有電話聯絡，但會避忌單獨去街。」
應采兒自言還年輕，拍拖未必長久，問她是否因公司壓力而不敢承認拍拖？她說：「公司不嬲唔鍾意女藝人拍拖，覺得女仔一拍拖就分心，冇咁專注工作，我得二十二歲，拍幾個月拖就散，之後大家可能連朋友都做唔到，所以搵到好嘅男仔，我寧願做住好朋友先，到真係諗住結婚嘅時候先拍都未遲，我冇信心𠵱家拍拖可以長久。」
問應采兒是對自己沒信心，還是不信任男方？她說：「藝人同藝人拍拖，傳媒都唔會寫好嘢，唔係寫同邊個新歡食飯，就係同第二個有嘢，好易俾人拆散。」講到對孫耀威的印象，應采兒竟說覺得他是屬於八十年代，相信孫耀威聽後必定很傷心。
愛男人白手興家
應采兒早前亦曾和林建岳的兒子林孝賢傳緋聞，有人認為她鍾意𠝹有錢仔，應采兒說：「我唔會同一時間鍾意好多男仔，如果拍拖我會好專一，但識好嘅男仔唔易，有啲人話我鍾意𠝹有錢仔，其實只係咁啱識咗啫，大家都喺外國返嚟，係同一個generation。我覺得將來結婚唔會揀個太有錢嘅，因為有錢仔唔知個世界係點，我鍾意個男人就算有錢都係自己搵番嚟嘅，而唔係屋企畀。」
