天安（028）上星期五彈6%、上海復地（2337）4%，上置（164）係咁易3%，同區股湯臣（258）零彈幅，可以一試。
湯臣每股資產值5.6元，NAV折讓44%，天安及上置NAV折讓62%。冇錯，湯臣未必算最吸引，但資產組合勝在夠平均，手頭現金高達15.3億元，佔總資產值近40%。呢勻率先起步嘅復地，現金佔資產值不過17%，其餘天安及上置約莫5%。再詳細計數，湯臣淨現金7億元、復地1.8億元，天安及上置係淨負債。祖國樓市俾人橫風橫雨感覺，湯臣現金底厚，進可攻退可守。湯臣上個月頻頻出手回購，回購價都講緊1.76元至1.85元水位，呢勻博反彈，跌穿橫行支持1.7元走人，向上博見50日線1.96元，值博率2比1，重講緊有資產折讓，同區復地，現價（2.15元）係NAV1.3倍，照咁睇，湯臣短線值博率，合情合理。
海化潛在回報4成
海域化工（2882）對上星期五，成交接近兩球貨，幾搶眼，可以吼吼。又講兩點：第一，呢期有部份工業股，因為專利問題俾人起訴，插到甩轆，海化做貴金屬電鍍工業，唔存在呢類潛在風險。第二，海化05年度中期（9月止）純利3900萬元，增長31%，已經有中期墊底效應，又阿媽海域（1220）年度結算日定喺12月31號，所以，阿媽04年年報睇到嚟自貴金屬電鍍業溢利上9000萬元，意味海化到上年底頭3季都係大豐收，05年度最後一季係咁易賺上千萬元，全年度純利已經上億，PE不過5倍。海化預期PE目標上到7倍，股價1.65元過外，回報率講緊4成。
錢雋