西貢一向是度假天堂，每逢假日必然熱鬧起來，日夜到訪西貢，你會有兩種截然不同的感受。白晝的西貢甚麼也慢三拍，你大可調校一下平時緊張的生活節奏，慢條斯理四圍逛，逛累了，就揀間地道食肆，舒舒服服歎各國美食；入夜，意猶未盡，找間酒吧與朋友狂歡暢飲，保證盡興而歸。想感受當中滋味，就由地膽河國榮做嚮導，帶你掃街玩盡西貢DayandNight喇！
記者：陳冰麗
攝影：陳盛臣（Amigo's、Cru）、林栢鈞（旺泰特食）
CafeAmigo's必歎焗墨西哥卷
家住清水灣的河國榮常到西貢打躉，一來貪交通方便，二來可輪流帶11隻愛犬散步。人狗經常出巡，久而久之對西貢瞭如指掌，每有新食肆開張，他第一時間知道：「好似呢間開咗無耐嘅『CafeAmigo's』，都係我帶狗散步先發現到，若非喺『滿記』附近，普通人根本唔識嚟。」此店以橙及橘紅為主調色，店小但精緻，大至裝修小至一枱一椅，都由老闆夫婦一手一腳完成。
「CafeAmigo's」是區內唯一墨西哥菜館，主打Fusion墨西哥菜，河國榮是這裏熟客，一有假期即到此打躉：「老闆兼大廚叫Jerry，佢好Nice又好傾，如果有時間，我可以同佢傾足大半日。」他最愛露天座位，貪可與愛犬曬日光，舒舒服服歎至愛的墨西哥卷：「肉餡唔肥膩，好好味！」其他如燒雞薄餅、煎青衣柳配蝦子牛油、香煎雞胸配巴馬火腿等也屬必試菜式。
CafeAmigo's（27929337）
地址：西貢普通道11A地下
營業時間：12:00nn至12:00mn
座位：23個
必試推介
焗墨西哥卷$75
墨西哥Tortilla皮包紅腰豆、雞或牛肉等肉碎，配自製紅色帶辣茄醬、綠色清香牛油果醬及白色忌廉醬伴食才地道。河國榮推介：「最好趁熱食。」
煎青衣柳配蝦子牛油$82
魚塊煎得剛剛好，不會太熟沒有腥味，配加入蝦子的牛油，未吃先聞其香。
香煎雞胸配巴馬火腿$75
沒多餘調味，只有微微酒香、巴馬火腿及芝士的鹹香味，半溶芝士在口內慢慢溶化，好過癮。
特色燒雞薄餅$70
Tortilla皮做餅底，Toppings有雞肉、青紅燈籠椒、洋葱、蘑菇，芝士勁香餅底薄脆。河國榮：「比意式Pizza更香脆。」
Cru澳洲肉眼扒份量十足
河國榮在澳洲出生，一發現主打澳洲菜的「Cru」，登時有他鄉遇故知之感。「Cru」不易找，因隱藏在市中心內巷，毗鄰是藥房與菜檔，面對着公園，他也是拖狗散步無意中發現的：「雖然好難搵，不過正好遠離馬路同碼頭，店外擺幾張枱櫈勁有外國露天餐廳Feel，好Relax！」問有何推介，他即答：「鹽燒肉眼扒啦！」就是如此普通的肉眼扒？「肉眼扒燒得剛剛好，外面少少脆裏面好Juicy，啖啖都好有肉味。」
他大讚食物質一流，除澳洲菜，大廚Wayne還玩Fusion，加入日、意、泰等煮食元素，如招牌菜吞拿魚芝麻卷，就是西日合璧，香草芝士焗雞胸則混合意式風味在內，在品嘗菜式同時，可要試真附送醬料，全部都是自製的！
Cruwine&grill（27911792）
地址：西貢灣景街18號地下
營業時間：8:00am至10:30pm
座位：室內40個、室外20個、樓上30個
必試推介
鹽燒肉眼扒$220
澳洲肉眼扒彈性十足，只加少許海鹽即能帶出肉鮮味，大廚燒扒有水準，外層脆口內層肉汁豐富，一件有16安士，足4人食：河國榮：「肉眼扒煮得好，唔Easy㗎。」
香草芝士焗雞胸$130
咬落有意大利軟芝士的鹹香，亦有番茄酸甜，味蕾雙重刺激，蘸意式秘製香草汁更惹味。
吞拿魚芝麻卷$85
吞拿魚混麵豉醬、蝦膠，外層再蘸黑白芝麻略炸，少見吞拿魚吃法，多了芝麻香口感卻不影響吞拿魚鮮味。
旺泰特食地道燒烏頭夠特別
開業不足一個月的「旺泰特食」是區內少有的泰菜館，沒有金碧輝煌裝潢，只有幾幅泰皇掛畫、大象形掛鏡及掛燈作裝飾，河國榮也被其簡約布置而吸引：「呢度好有泰國小店特色，樓面9成係泰國人，食物夠地道，所有人都好Nice，大廚兼老闆叫Nai，幾唔得閒都走出嚟問食客意見，保證閣下食到滿意為止。」他強烈推介燒烏頭：「唔係好多泰菜館做到，食到嘅，質素都好參差。雖然每次Order都要等15分鐘，但值得！」其他地道菜還有泰式炒椰菜苗，爽口又惹味，海鮮咖喱焗椰青，咖喱汁送飯一流，淨吃泰式釀雞翼就夠味道，甚麼雞醬都毋須蘸。
旺泰特食（27910522）
地址：西貢萬年街24號地下
營業時間：12:00nn-12:00mn
座位：50個
必試推介
燒烏頭$68
明爐烏頭試得多，加海鹽原條燒則少見。河國榮：「魚燒得啱啱好，肉重濕濕哋唔太乾，原汁原味夾雜香葉嘅香味，錦上添花。」
泰式炒椰菜苗$30
大廚謂椰菜苗正宗食法吃其爽口，煮過腍則失原有味道，泰式食法必用麵豉、辣椒仔、蒜茸同炒，勁香且辣。
海鮮咖喱焗椰青$75
咖喱是這裏招牌菜，河國榮：「除咗辣，重好香，有咖喱嘅濃香，亦有椰青的清香，汁撈飯，正呀！」
泰式釀雞翼$38
金黃色雞全翼內釀用泰國臘腸、腰果碎、西芹粒、芹菜粒等炒香的糯米飯，皮脆餡香口。
