程翔被困國內失去自由，佢太太劉敏儀仍唔敢輕舉妄動，噚日上電台節目表現得好平靜，認識程翔嘅人，無一不讚佢為人正直誠懇，劉敏儀噚日就爆出當年兩人邂逅經過。話說當年程翔係港大國粹派活躍分子，求學時基本上以搞學生會活動為主，讀書其次，畢業後都成日返港大行走，當時劉敏儀透過宿友知道有程翔呢個人，事關同學最記得佢每日都喺宿舍「為人民服務」，負責抹地，而劉敏儀當時係學生會時事學會成員，不時見到程翔，佢話記得程翔有約佢去街，但佢當時無乜感覺，請程翔食檸檬拒絕咗。
劉敏儀話畢業後做記者終於再遇程翔，雖然當時兩人都已經各有拖友，但緣份要嚟嘅時候，真係擋唔住，結果兩人拍拖結埋婚，一齊走過半生歲月。
爆料熱線：29290000、27860099
報料傳真：26239278
報料電郵：[email protected]