晨曦囊括本地球壇四大賽事錦標，一度成為佳話，贏晒各項賽事冠軍，班主自然高興，決定再「加碼」，獎勵班球員。
班主周氏兄弟請晒全隊球員，今個禮拜去日本東京旅行五日，而適逢今季西甲聯冠軍巴塞隆拿到日本踢表演賽，一於唔放過呢個難得機會，拉大隊去埼玉，順道睇埋禮拜三對浦和紅鑽場友賽。今日先鬥橫濱水手嘅巴塞隆拿，一批主力好似朗拿甸奴、佩奧爾、伊圖等就無隨隊，人腳唔齊全，之不過有得免費睇波，有咩所謂？
其實，球員如果踢得好，班主應該慰勞吓佢哋，雖然要好似車路士班主阿巴莫域治咁，借隻豪華遊艇畀林柏特玩兩個禮拜就無可能；但𠵱家晨曦班球員攞完高達六位數字嘅獎金，重有得免費旅行兼睇波。以香港今時今日球壇市道慘淡情況，仍然有班主肯揼錢慰勞班球員，真係唔話得。