六月七日,本欄講賓架G自港大畢業,從沒收過港大校友通訊、校友雜誌之類。文章一出,一啲讀者大概係港大校友,立即來電郵,包括AndrewCheung、RebeccaLam以及港大校友事務處嘅JaniceChan,佢哋話港大每年分春夏秋冬出版一本《ConvocationNewsletter》,寄畀七萬六千個校友,只要校友肯通知港大關於地址更改,就會收到。賓架G以及其他冇收過之港大人可以上網睇www.hku.hk/convocat/newsletter.htm。
賓架G睇到本欄,應該自動上網更改地址喇啩?
自稱「低微的、不識搵錢的、先生不會信任的」謝鴻興醫生來電郵話:「每一個人都要為自己的說話負責,只要是本人說過的,先生完全可以對本人之說話作出批評,本人毫無異議,完全接受,亦有助本人自我檢討。」
兩位球迷Roger、吳先生來電郵指出,曼聯近兩屆並非全部四大皆空,今年曼聯攞唔到獎盃,但去屆得到英格蘭足總盃冠軍,謝謝指正。
一位讀者蘇先生話想知道「黛安芬」上市資料。讀者一問,左丁山查一查,原來寫錯咗,香港一間「內衣專門店」上咗市,叫做「黛麗斯國際」(TopFormInternational),編號三三三,○四年賺一億五千幾萬,純利甚佳。
一位林太來電郵問及本欄喺四月十九號談及中五會考音樂科之考試範圍。林太話已經退休,想聽勻全部setworks,增加音樂通識。林太既有大把時間,聽音樂,順便學習埋作曲家背景資料,正係有益有建設性。買齊全部約需二千五元左右(HMV價錢),或者你去其他音樂店逐隻執,價錢可以便宜啲,至於張清單囉喎,請你向教統局音樂科查詢。
蘋果讀者眾多,見識廣博,在此寫稿,偶有錯漏,一定有人來電郵指正。咁嘅讀者群,正是最好廣告對象!