老董做特首七年幾，落台前個樣殘晒，煲呔𠵱家日日處於作戰狀態，個人望落去真係零舍唔同，其實佢已經六十歲，望落真係唔似已屆花甲，查實佢四四年出世，有人問佢咪成六十一歲？點知佢唔認老，堅持自己未過生日，所以今時今日重係六十歲。
「身體健康」做到72歲
計落煲呔做兩年特首，都係六十二歲，再做五年先六十七歲，若然「身體健康」，隨時可以做到七十二歲先退休，咁佢真係要保重身體，否則好似老董咁就功虧一簣。
噚日係端午節假期，曾經喺沙田做過民政專員嘅煲呔，本應可以署理特首身份舊地重遊，去城門河主持龍舟競賽頒獎禮，不過佢辭職參選特首，呢個「衣錦榮歸」同鄉紳父老見面嘅機會就冇咗，變咗由署理特首唐英年去主持。
雖則特首競選終點在望，但煲呔唔敢鬆懈，公眾假期繼續拉票，噚日一早起身着晒整齊西裝，打埋煲呔，神情輕鬆出花園淋花餵魚，記者問佢做乜放假都開工，佢扮懵話：「今日假期咩？一陣重要去電視台做訪問呀！」之後佢又同記者吹水，話記者日日影佢餵魚淋花指定動作，悶死讀者。唉，你估記者唔知咩，不過任務在身都要影相，惟有無奈咁同佢講，「我哋都係指定動作啫！」
爆料熱線：29290000、27860099
報料傳真：26239278
報料電郵：[email protected]