要做落水狗真係唔容易！香港大部份沙灘都唔畀狗仔入場，如果想同狗仔暢游，除咗去寵物會泳池外，就只可以租船出海去無人沙灘。「無所謂吖！當遊船河囉！」係！筆者出發前都係咁諗，但當日無雨無雷卻大風大浪，人狗齊齊暈船浪。幾隻狗四圍嘔，場面比之後嘅群狗玩水划船仔更加壯觀！
記者：馬慶武
攝影：梁細權
暈晒大浪狗仔也會嘔
連續幾日風雨過後，今天終於風和日麗，人、狗開開心心出海喇！點知去到西貢一帶海面，突然高潮浪接浪，人坐唔定、狗跣唔停，開頭個個嗌刺激：「嘩！好似玩海盜船咁呀！」
搖咗20分鐘，境況依然，但狗主們開始知錯。有啲捉實欄杆，有啲發呆攬實自己隻狗，狗仔更加驚到震。最後人狗齊齊嘔，捱咗成粒鐘先至到達目的地，主人同狗仔即時爭住落船腳踏實地。筆者亦終於證實狗仔都會暈船浪，真係好有人性呀！
飛身搶灘失控喪擺堆
大家分批駁船上岸，雪橇犬同金毛呢類大狗最大膽，未泊岸已搶灘。之但係松鼠、史納莎之類的細狗就唔係好敢掂水，最後要狗主們使出硬功，半推半就洗濕個頭。
接下來，今次的活動搞手「狗友城堡」已經安排好一連串節目，先自由活動玩吓游吓水，狗仔們忙住接飛碟又追波仔。唔知係咪因為好耐未嘗過腳踏沙地的滋味，狗仔們瘋狂四圍擺堆！搞到狗主們忙住四圍執屎，成就另一壯觀場面……
上船回航即刻洗白白
食完午飯開始玩划艇，狗狗們的參與度極低，只係留喺艇上左望右望。呆到三點幾開始回程，再次經歷大風浪，不過今次人狗都有準備有經驗，大家都冇咁狼狽！
食飽玩飽濕晒身，上船梗係要即刻用清水沖身，尤其要沖肚皮位置，因為呢個位積沙最多。而且狗主們個個都會幫狗狗率先吹乾肚皮，以免狗仔冷親。記得沖乾淨狗身上嘅沙後，返到屋企要用專用沐浴液進行大清洗，腳趾罅、耳仔都唔可以放過㗎！
