黃金集團（臨時編號2985）在完成收購兩間澳門酒店連賭場後，成功由一隻殼股變成真正澳門賭業股，但因為被股壇長毛質疑公司出售一項節能業務交易有古怪，令到芬佬信心受損不斷沽貨，股價由３元水平一路跌至家陣2元水平。
雖然家陣濠賭股氣氛欠佳，連龍頭股如新濠國際（200）同埋嘉華建材（027）都炒極唔起，而有不利傳聞在身的黃金集團，就更加難有好表現，不過大股東朱太近來在黃金股價低迷之時密密增持，計落有成2600幾萬銀。
經紀陳話，由於隻股已經跌咗好多，大股東又肯增持，所以唔使睇得太淡。噚日黃金搞酒會有好多大粒佬到賀，聽講話好似有啲嘢跟尾，不妨睇實隻股走勢，伺機短炒一轉。
小初亦同意經紀陳睇法，皆因黃金被股壇長毛踢爆節能業務交易可能有景轟之前，一直都興致勃勃出去歐美路演，睇嚟唔似跟風玩玩吓，雖然現時嗰單問題節能交易尚未搞掂，但雨過天青之後，股價表現相信會唔同晒，黃金昨跌3%，收1.93元。
慕容小初