曾鈺成喺佐敦嘅地區辦事處噚日開幕，搵咗署理特首唐唐做嘉賓，坊間一度盛傳煲呔會「路過」順便拉票，不過最終都冇出現。辦事處好細，全部愛國愛港嘉賓迫晒入去，記者點都迫唔入，唐唐就喺裏面同啲愛國人士傾咗好耐都唔出嚟，唔知係咪要拉定票，兩年後上演武士復仇？
曾鈺成致辭話，希望多啲年輕人參加○八年立法會選舉，如果年輕人接到棒，咁佢就可以退落嚟啦！不過原來話退，都係曾鈺成一廂情願。曾鈺成之後同記者解釋，退唔退都係未定，因為都要睇黨嘅決定，加上○八年嘅選舉制度都未知，或者會增加議席，到時可能由佢排喺張名單下面，捧啲年輕人上嚟選。
左派陣營蜀中無大將，就算曾鈺成唔係隨口講，睇怕民建聯唔會畀佢咁快退啦。
傳真︰2623-9278
電郵︰[email protected]