好多時聽人講「我無時間做運動呀」，但另一方面就日日夜夜喺度煲機，將打機同運動結合為一，可能係「最有吸引力」嘅瘦身良方，專用眼仔玩遊戲嘅《EyeToy》，考驗玩家真實反應，就最符合健康要求，最新一集《EyeToy：Play2》繼承上集好反應，再接再厲，有齊打拳、棒球同足球等Mini-Games，嚟緊有咩大小Party，記得預埋佢！
記者：許福合
攝影：陳偉強、許福合
ImageModels：Ann、Cammy、Andy、Terence（Startron）
當第一集嘅《EyeToy：Play》推出時，憑創新眼仔玩法，大受好評，尤其歐美等地更係創出佳績，之後更陸續有其他採用《EyeToy》玩法嘅遊戲，不過講到遊戲系統，自然以《Play》系列先係正宗，新作無論從遊戲性同耐玩度都大幅進化，所以今集《Play2》就受到唔少機迷所期待。
4人團體戰
《Play2》一開始同好多Games一樣都係選擇模式，不過操控已經完全唔同，連揀邊個Mode玩都要靠喺鏡頭前拍吓拍吓，新作一共有12款系列遊戲，包括拳擊、足球、棒球等唔同款式，而且入咗去重可以有更多唔同玩法，總共有超過70款不同類型Mini-Games，各自有唔同特色，長玩長有，玩極都咁有新鮮感！遊戲雖然同時只能容納1人喺鏡頭前進行遊戲，不過講到PartyGames之一，自然唔少得作個比拼，《Play2》可以設定一個4人比賽，自選或由電腦選擇數個MiniGames進行遊戲，玩完之後，電腦都會因應玩家表現給予分數，一班人圍埋一齊玩就最啱。另外，開始遊戲時記得影番張相，遊戲會將閣下大頭照放入公仔頭內，於遊戲內代表玩家，見到自己走出來，就要立時上前出戰！
偵測揮拳速度
今集《Play2》延續咗一貫老少咸宜嘅風格，基本上完全無考智力、解謎元素，遊戲講求玩家反應、敏捷度，對玩慣《Biohazard》一類遊戲，呢類唔使用腦遊戲又可能會有另一番風味。試玩時，原本以為同上集相比，只係遊戲變咗，玩落先知無咁簡單，原來《Play2》加入咗新影像辨識技術，唔單止知道玩家動作，更可以偵測揮拳或擺動速度，再反映喺遊戲之中，試過幾款Games之後，發覺最過癮都要數打Boxing，揮拳快啲就可以打得大力啲，玩完一輪真係好似做完運動一樣，出咗一身大汗！
遊戲變成實用軟件，又唔知各位機迷受唔受落呢？《Play2》提供咗個監視功能，雖然同正式產品比較，可能略為簡單，但仍可將監視範圍內「移動物體」記錄下來，兼且喺電視上顯示警告訊息。
遊戲介紹
化身守門員
自問係《Winning》高手，今次輪到你守龍門又唔知會點呢？玩嘅時候唔使左撲右撲，算係好輕鬆，不過相當考驗玩家反應，有時發球機發球速度又會改變，都有難度！
空手道刀招
空手道雖然唔係好多人識，不過入到Game包你可以成為黑帶高手，重可以空手劈冰，不過想一手劈開冰磚，就要計算埋力度。
打棒球
用手接棒球，真實唔想斷手都幾難，不過喺《Play2》內就要接得愈多愈好，發球速度更會不斷提升，真係要變作八爪魚先可應付！
自彈自唱
拿起結他自彈自唱唔一定要識樂譜，喺《Play2》內可以「拿起」結他彈個飽，勝負就同聲音無關，只要彈得勁拎到高分數就勝出。
跑得衝勁
今次就轉到田徑場，來一場極速比賽，不過玩家落場就唔使用腳來跑，只要雙手狂「抽」，就可以出賽，愈抽得勁，就跑得愈快。
乒乓波
講到最似真實嘅遊戲，就不得不數呢個乒乓波，只要將雙手當成乒乓波板，左抽右捎，當個波位置適中，重可以來個抽擊！
拳拳到肉
想考驗自己拳頭嘅實力，就要數呢個拳擊Game，鏡頭會偵測揮拳速度，從而反映打擊嘅力度，要打得勁啲，就要起勢咁揮擊。
玩家意見
遊戲資料
主機：PS2
製作廠商：SCE
類型：動作/智力
遊戲人數：1-4人
推出日期：6月16日
售價：$338/$428（連眼仔）
(C)SonyComputerEntertainmentEurope
