歐洲足協噚日透過電話視像會議，宣布准許利物浦衞冕下屆歐冠盃，原本對紅軍係一個好消息，不過紅軍就要面對三大苛刻條例，隨時畀呢個糖衣陷阱搞到一身蟻。
1：利物浦需由歐冠盃第一圈外圍賽開始角逐；
2：利物浦不會獲得「國家豁免對壘」優惠，外圍賽第三圈有機會對同國的曼聯或愛華頓，小組賽有機會遇到車路士或阿仙奴；
3：利物浦在小組賽的電視轉播收益較其他英格蘭球隊少。
由於第一圈外圍賽喺七月十二日展開，利物浦要六月尾就開操，對紅軍球員嚟講，就要縮短半個月假期；而紅軍原本安排七月尾喺日本嘅兩場「掘金」表演賽恐怕難成行。重有紅軍教頭賓尼迪斯一早諗定可以打歐冠盃，頻頻喺轉會市場搵人，好似傳過想簽魯爾、連拿等；冇得喺亞洲掘金，電視轉播收益亦少咗，重有冇咁大筆錢買人呢？如果一吓唔好彩，好似紐卡素三季前外圍賽出局咁，隨時搞到班波兩頭唔到岸。