左丁山住過好幾間海外五星級酒店，碰到同一樣嘅要求，就係在浴室內有一張印刷精美嘅字條，意思係：「因環保理由，請你珍惜用水，浴巾毛巾未必須要每日更換。如須更換，請把毛巾放在浴缸內。」第一次見到，為咗尊重「環保理由」，冇換毛巾兩日，第三日就頂唔順用濕毛巾抹身，幾大都要換過晒啲乾嘅。之後見得多，諗諗吓，酒店收我咁多錢，百幾二百美元一日，英國、美國啲酒店閒閒哋每日收三百美元，我只係每日在房間內睡覺八小時啫，換條毛巾都有罪惡感？於是睬佢都儍，日日要換新毛巾。
呢日睇《南華早報》LaiSee專欄，講到北京十三間四星酒店包括建國（Jianguo）、西園（Xiyuan）聯手搞一個「綠色行動宣言」，宣布逐漸取消提供酒店房間內浴室用品如牙刷、牙膏、拖鞋、洗頭水、沖涼液、梳等等，跟住就會停止每日更換毛巾、床單。大家到北京住呢啲四星酒店，記得自備上述用品，至於毛巾、床單，就忍一忍啲身體氣味啦。
𠵱家乜都講綠色、講環保，左丁山懷疑啲酒店以此為包裝，想慳錢，節省經營費用就真。左丁山以前做過幾十間酒店投資分析，每個月睇住幾間五星、四星酒店嘅損益表，知道洗頭水、牙刷呢類用品，佔酒店總經營成本，只係一個好少嘅比例。呢類大路貨來價十分便宜，供應商其實冇乜賺頭，但係因為包裝得好靚，人客重會誤會係高級用品㖭。
睇怕下一步就係要求酒店住客少用空調、少用電，一切假環保之名行之。上次左丁山到曼谷，五星酒店房間內燈光昏暗，睇報紙與寫稿都有困難，於是要求換房，酒店話咁至夠羅曼蒂克氣氛與輕鬆云云。大家拗咗一輪，卒之要補錢upgrade去一間光猛大房，實在係俾酒店搵咗笨。