個市有啲隔夜油炸鬼味道，暫時冇乜火氣，恒指高低波幅只係56點。中芯（981）爬升4格，中石油（857）復牌升0.15元，中海油（883）升斗零，相關C輪就打入10大龍虎榜。
中芯C輪3868：英特爾又有利好消息，刺激中芯股價。中芯C輪4699彈升56%，溢價2.9%，重有7日交易，時間因素不利，最後多數係咁先。短期輪比較實際嘅係3790，8月初到期，輪價16.1仙，溢價1.9%，槓桿率10.4倍（有效8.2倍），引伸波幅30.5%。稍遠期嘅對象，3868比較實際，10月初夠鐘，輪價27仙，溢價5.4%，槓桿率6.2倍（有效4.6倍），引伸波幅42.3%。實際唔代表一定會升，須提防正股有回吐。
中石油C輪3968：中石油C輪升得最勁嘅係3518，收56仙，升27%，低溢價，槓桿率唔算低，輪價跟正股通常都跟得貼。3968係熱門貨，收54仙，升17%，已現負溢價，9月下旬夠鐘，負溢價0.2%，槓桿率10.1倍（有效8.3倍），引伸波幅19.9%。睇數據，3968有得諗，不過正股升咗咁多，有啲超買，高價追C輪先要諗吓風險嗰邊。
中海油C輪3864：中海油C輪3733升27%，打入龍虎榜，成交金額有36萬元。隻輪重有兩個月壽命，溢價11.1%，賭呢隻，要先抱住會輸嘅心理。中海油C輪，好難搵對象，普遍成交唔夠，又或者數據唔得吸引。交投金額最多嘅係3864，有365萬元，10月初到期，輪價15.4仙，溢價11.7%，槓桿率27倍（有效9.7倍），引伸波幅29.9%。過多1段時間，如正股冇乜動靜，揸隻輪會輸到呱呱叫。
章盛