希爾頓酒店集團後人ParisHilton，早兩個星期突然宣布同拍拖八個月嘅希臘船王後人ParisLatsis訂婚，重會喺下個月結婚。正當好多人對Paris突然修心養性起疑問之際，日前Paris出席派對時被人見到佢腹部微隆，重經常用手袋遮住個肚，有人估計Paris已經珠胎暗結，所以今次係奉子成婚。
話說Paris上星期同圈中好友蓮莎露夏恩（LindsayLohan）齊齊喺洛杉磯出席派對期間，Paris成晚都用個手袋仔嚟遮住個肚，當有攝影師要求Paris同蓮莎合照時，Paris一時鬆懈，俾人影到佢腹部微隆嘅相，同平時骨瘦如柴嘅佢，明顯唔同晒，難怪唔少人都懷疑佢已經懷孕。而前日Paris同未婚夫ParisLatsis喺加州shopping嗰陣，又着住一條鬆身裙，佢又用手袋遮肚，不過都凸出咗個小肚腩。
籲簽婚前協議書
另外，紐約富商特朗普（DonaldTrump）日前呼籲Paris，佢嚟緊同未婚夫結婚嗰陣，記緊要簽婚前協議書，費事第日俾人分身家，不過特朗普似乎唔知ParisLatsis嚟自富裕家庭，重係全球第五十四個最有錢嘅家族，睇嚟驚俾人分身家嗰個，係ParisLatsis至真！
另外，BritneySpears近日收到老公KevinFederline所送嘅五卡半鑽石婚戒，據講佢兩個喺上年結婚時，因為Kevin身無分文，所以到今時今日先補送隻靚戒指畀老婆。