美國紐約地產大亨DonaldTrump喺九四年幾乎破產，曾經走嚟香港賣遊艇，搵到鄭家純、羅康瑞等人集資買咗佢一大座赫遜河邊物業。眨吓眼過咗十一年，紐約樓市狂升，最近呢座物業賣咗出去，作價十八億美元，聽講香港班富豪賺咗成一百億港紙，鄭家純佔最大份。
買家係美國著名投資財團Carlyle集團，此集團由美國一班大富豪、大人物創辦，包括老布殊在內，當然唔係泛泛之輩，亦唔係趁機炒一轉嘅地產炒家。Carlyle有一位顧問ArthurLevitt，係前任證監會主席，美國商界無人不識，佢現在做好多間美國公司顧問，有頭有面，接受彭博電視訪問時，主持人問佢：「香港富豪與DonaldTrump賣樓，Carlyle接貨，你哋是否認為樓市會繼續上升？或者你哋會摸頂？」Levitt大耍太極，猛咁講地產市道有周期，紐約樓市每次跌市之後，必然反彈，再闖高峯，所以喺紐約買樓，長期實掂。主持人追問佢：「現在樓市周期到咗底還是到咗最高峯？」Levitt又話：「我唔會沽空紐約。」
呢番說話，似曾相識，我哋香港人都怕耳熟能詳啩，入咗貨，價錢跌，咪當係長期投資囉，假以時日，一定會升番上去嘅。我哋散戶投資與Carlyle咁大嘅財團，想法都會一樣。問題係特朗普係紐約地產市場內之聰明大鱷，佢九四年之時死都唔肯沽，情願出售大部份股權畀香港人，○五年個個話美國房地產市場冇得頂，特朗普就肯制，賣畀Carlyle呢班老行尊，你估邊個會眼光敏銳啲呢？左丁山就認為特朗普醒啲咯，睇嚟美國地產就算未到頂，都怕距離不遠，美國樓市一滑落，美國人冇咗財富效應，點可以持續消費呀，分分鐘會導致經濟感冒，傳染到香港傷風，香港啲廠家接美國單慢咗嘅話，本地豪宅就冇得豪氣咯。