恒指最高曾升83點，埋單微跌0.2點收場。期指曾過萬四點之門，最高見14038，最後收13912，跌10點，仍高水14點。隔晚有C輪在手者，空歡喜一場。早上撲入市買C輪者，午後已見傷痕，部份且傷勢不輕。
滙控C輪4441：滿城爭說滙控C輪4441。隻輪本月22日最後買賣，尚餘9個交易日。前昨兩日，共成14.81億份。經濟通所示發行量36億份（彭博所示發行量30億份）。上周一，街貨36%，前日降至24.4%，即發行商近日大量回購，街貨已減至8.8億份。昨日街貨應已再減，數據要今日先至知道。
4441最高18.2仙（升58%），收13.9仙（升21%），溢價0.6%，槓桿率89.6倍，末日輪不必理會有效槓桿率與引伸波幅。行使價123.88元，以13.9仙買入，係假定最後5日滙控（005）平均價會喺125.27元以上。以最高價0.182元買入，係假定滙控平均價會喺125.7元以上。滙控昨收124.50元，升0.5元。
如果高價買入4441者係發行商，相信發行商對滙控睇好。滙控睇好，吼C輪炒，揀對象，昨日推介嘅4875最為實際，回報可能較低，風險亦係。4875昨日冇升，抵買。
章盛