昨日個市雖然靜，但有唔少股份冇厘頭咁升，其中中國無線（2369）已經連升數日，但公司話唔知點解。
經紀陳叫小初數下手指就會知，原來隻股剛剛上市夠6個月，個別股東禁售期屆滿，而公司亦可以發新股，估計係呢啲原因令隻股變得波動。
中國無線喺去年12月中掛牌，公司招股價0.86元，但第1日就潛水兩成幾，手上有貨都咪話唔心酸，據講係因為招股時貨源分得太散，好多落入台灣幫的股份被隨手沽出市場，股價最低跌過落去0.57元。
隻股本質其實唔差，早排公布業績又有息派，在連升兩日後，中國無線昨日最高見0.85元，收0.82元，升5.1％，成交股數653萬股，金額528.6萬元。
經紀陳話，隻股跌咗一段咁長時間，估計貨源已收齊，但浮番上招股價，始終會有多少壓力，所以唔使急住買。
慕容小初