上市公司黃金集團收購澳門君怡同皇家金堡兩家酒店啱啱完成，噚日喺灣仔君悅酒店舉行慶祝酒會。同賭業有關嘅港澳兩地知名人士差唔多到齊，因為畀面澳門葡京最大賭廳──黃金廳嘅廳主李惠文。人稱福哥嘅李惠文（別名李樹福）係黃金集團非執行董事，佢嘅愛女朱李月華係集團嘅董事總經理。
噚日到賀嘅嘉賓有成五百人，包括賭王何鴻燊同四太梁安琪，持有澳門娛樂股份嘅新世界發展主席鄭裕彤、佢個仔純官鄭家純，同彤叔老友鬼鬼嘅大劉劉鑾雄、殼王陳國強、玩具大王蔡志明、中國星向華強夫婦、澳門賽馬會董事總經理李志強等，重有英皇大股東楊受成，話說佢喺澳門間英皇娛樂酒店都就嚟開張。總之噚日喺君悅，直情係澳門賭業猛人一次過「晒冷」，黃金集團酒會嘅盛況同曾蔭權見選委有得揮。
爆料熱線：29290000、27860099
報料傳真：26239278
報料電郵：[email protected]