曾爵士向八百「選委」訓政完畢，即時展開戲肉親民大騷，由即日起，旋風式席捲十八區，不但繼承肥彭食蛋撻精神，而且重加碼發揚光大！
肥彭初來香港，同香港街坊冇血緣關係，飲碗涼茶握吓手就收手！
大玩親情念舊有優勢
煲呔就唔同，由於係香港土生，有優勢，煲呔可以去到荷李活道警察宿舍玩親情大念舊，緬懷「樓下閂水喉」式生活，肥彭就去唔到咁盡嘞！
身為爵士，都重走去香港仔坐吓艇，買吓生果送畀啲漁民，表演香港人、香港心、香港情。
煲呔上場後，民望一直高企，不過希望佢唔好天真到以為日日都係年初一，好似最近一啲關於六四、23條嘅言論，明顯就唔係想講畀香港人聽，而係想向中南海諸公表演政治正確。須知道老董最初民望都企過靚位，一衰起上嚟就恨錯難返。
好多最初對老曾有期望嘅人，現在都開始有話講，對於未來特首嚟講，真係唔多值得恭喜。
現時嘅反曾勢力，同七年來反董嘅民間呼聲不同！反曾勢力品流複雜好多，有反港英餘孽嘅土共老左滲入，將仇恨陳方安生嘅餘恨全盤轉嫁落煲呔身上，亦有今次推舉上海籍太子黨上位唔成嘅自由黨，亦有公務員內部唔順煲呔嘅勢力。
兩年後嘅嘢唔到你諗
因為，如果連啲擁躉都動搖，你話佢幾危險呢？所以八方認為，煲呔諗嘢唔好諗得咁長遠，如果諗住要討好中央又要討好土共，再要諗住兩年後繼續坐住張寶櫈，就一定冇好日子過。倒不如本來係點就係點，全方位為香港人做好事，北京嘅嘢唔到你諗，兩年後嘅嘢亦唔到你諗。
你當日係憑擅打逆境波上位，𠵱家要學打順境波呀！
爆料熱線：29290000、27860099
報料傳真：26239278
報料電郵：[email protected]