荷李活影星湯告魯斯(TomCruise)前日擔任美國名嘴JayLeno主持嘅清談節目《TheTonightShowwithJayLeno》嘉賓,表現雀躍嘅靚佬湯喺梳化上又叫又跳,十足一個大細路。
「希望共度餘生」
靚佬湯前日着咗件由美國海軍送畀佢嘅型仔皮褸,上咗JayLeno嘅節目宣傳新片《強戰世界》。心情大靚嘅佢唔止同主持有講有笑,重開心到企上梳化跳落地,成個調皮大細路咁。而靚佬湯同女星姬蒂荷姆絲(KatieHolmes)嘅戀情當然成為節目焦點,佢重好肉麻咁話:「我好想同佢去旅行同潛水,一齊共度餘生。」真係有啲似做戲講對白。
而前日有消息話靚佬湯拖咗好耐,終於答應電影公司下個月會埋位拍《職業特工隊》第三集,傳聞電影公司肯分番套片嘅三成票房收入畀佢,相信到時靚佬湯可以分到唔少。而套片已經決定咗搵喺《史密夫決戰史密妻》入面做配角嘅MichelleMonaghan擔正做女主角,頂替就唔到期拍攝嘅施嘉莉祖安遜(ScarlettJohannson)。