烏克蘭前日作客贏希臘一比○後，連教練布洛堅都話百分之九十九點九會出線。事實上，只要佢哋九月三日主場打低格魯吉亞，甚至會成為第一支歐洲隊（當然唔計主辦國德國）晉身決賽周，威過威士忌。近幾年每逢大賽，體育媒體數滄海遺珠第一個實係諗舒夫真高，呢支歌仔唔可以再唱囉。
又係嘅，自從烏克蘭參加國際賽以嚟，九七年喺世界盃外圍賽附加賽輸俾克羅地亞、○一年又喺附加賽輸俾德國，次次都差臨門一腳，攪到連我求大俠本來唔係佢哋球迷，都基於同情心開始幫佢哋打氣。今屆，明明知哋抽唔到好籤，同丹麥、土耳其同舊年做埋歐洲冠軍嘅希臘同組，估唔到一放絕塵，實在係值得出線嘅。
剩番傑斯做遺珠
成日喺大賽決賽周睇唔到好似舒夫真高呢啲頂級射手，又真係有啲遺憾。以後大家提到滄海遺珠，都係諗番傑斯算囉。