成龍繼上年發表「台灣總統選舉是天大的笑話」嘅言論惹起風波後，上月出席康城影展時，又話喺四年內唔會再去台灣，呢番言論再惹嚟台灣新聞局局長姚文智炮轟。直到噚日，成龍終以個人名義向台灣傳媒發出聲明，為之前嘅言論解釋，重寫明希望各報社能夠念着情誼，盡量刊登全文喎。
歪曲事實
成龍嗰篇長達三頁嘅文章入面，話會對自己講過嘅嘢負責，但唔能夠接受有人刻意歪曲，佢所講嘅「抓住我講的某句話就自己發揮、無限延伸，任意編織罪名加在我身上」、「說我『傷害了所有台灣人的感情』，這我不同意……請不要動輒濫用『全台灣的人民』來給我扣上『不愛台灣』的大帽子……我一再強調，是對事不對人」、「請不要拿我來當作政治的宣傳工具」等等，成龍雖然冇指名道姓，但矛頭似乎係指向姚文智。
自由抗辯
成龍強調佢愛妻林鳳嬌係台灣人，話台灣係佢娘家，跟住就講佢點樣將公益放喺第一位，點樣回饋社會，佢話「我反而會誓死捍衞他們批評我、詛咒我、毒罵我的人的言論自由……而我在此只為維護我一點點的言論自由抗辯。」成龍又話呢啲事有可能影響台灣喺國際嘅形象，但成龍咁講，怕且又會引發另一場風波啦！
