真激氣！每次看到我那個又矮又肥的上司行過，真想拿放在枱上的膠紙貼在他不乾不淨的嘴巴上。今天我邊打着文件，邊吃我的蛋包飯便當時，他竟然走到我的身邊，滿臉不屑咁話：「呢個都算蛋包飯呀？『散收收』，旁邊啲番茄青瓜亂咁擺，似垃圾堆填區多啲。」真係火都嚟埋，想話你呢種垃圾，早就應該拎去堆填區啦！我當然沒說出口。
其實今次真係我失敗，以為蛋包飯好易整，誰知原來都唔簡單，蛋我炒得過熟，所以到將啲飯放入蛋皮時，無法真的包得好好，真係甩甩漏。因為我貪紅米高纖維，所以用紅米做餡，其實白飯加茄汁會更正宗。後來打電話問二姐，佢話正確做法係用兩隻蛋做蛋汁，攪拌時唔好太杰，然後用平底鑊，加些牛油，塗勻鑊底，再將蛋汁倒入煮三分鐘，煮時用叉將蛋皮由外圈至內圈順時針輕輕地攪，把飯倒在蛋皮上，小心地將蛋皮翻上包成半圓形便可。加埋我啲紅紅綠綠蔬菜火腿，下次再整我個口臭上司實冇嘢好講喇啩？ （十二）
老四小吉