黃秋生近日成日批評圈中人，好少見佢會讚人，但最近佢竟然大讚台灣第一名模林志玲同徐熙娣（小S），秋生接受台灣傳媒訪問時話，全香港搵唔到一個好似林志玲咁靚同咁聰明嘅女星，秋生話冇乜奢求，只係想同佢食餐飯。秋生話香港啲女星有啲得個樣，但就唔夠聰明、有啲聰明嘅就唔夠靚，冇一個似林志玲咁好條件。
小S做戲一流
已經做咗人老公嘅秋生似乎對林志玲情有獨鍾，佢之後同台灣記者講：「我不怕你們寫，這就是我說的，只要和林志玲合照，就可以知道自己美不美，我想不會有人隨便想對號入座吧！如果可以和她吃吃晚飯就好啦！」
之後秋生又讚小S係一流演員，佢話：「不用任何證明，我看一眼就知道。」
佘詩曼容易受傷的女人
佘詩曼早前拍無綫劇受傷休息咗幾日，同劇演員林保怡之後寸佢咁易受傷係因為纖體纖到過晒龍冇晒肌肉。不過啱啱以纖體代言人身份去完馬來西亞宣傳嘅阿佘就解釋自己係因為長期缺乏休息，令到肌肉繃緊，所以先會咁易受傷，佢重話拍完呢套劇後，想放假休息吓。
蔡依林搵王力宏作歌
蔡依林日前拍攝新歌《獨占神話》MV，宣傳新碟《J-Game》。呢首歌由王力宏作曲，佢教蔡依林彈鋼琴之餘，重畀咗唔少意見，盡心盡力。蔡依林話本來邀請王力宏擔任MV導演，但可惜時間未能配合，但佢就話好欣賞王力宏嘅才華。
黎瑞恩B仔等改名
黎瑞恩前日剖腹誕下七磅仔仔，噚日佢老公曾智明去法國醫院探老婆，佢笑笑口咁話：「大家低調啲，我就平常心，個大女都好開心，都唔會刻意再追，𠵱家大細都好健康，改名就畀太太話事，我冇乜意見。」
謝霆鋒揀林嘉欣做老婆
謝霆鋒噚晚到商台為谷祖琳主持嘅《絕情谷》擔任嘉賓主持，講到自己現時揀女朋友條件時，佢就話對林嘉欣相當欣賞，重讚不絕口咁話：「我覺得林嘉欣好得體，笑容好真、好舒服，又識幾種語言，有修養，覺得有老婆嘅感覺。」
節目中又重提霆鋒同陳奕迅不和傳聞，霆鋒否認話：「我哋啱啱先打完羽毛球，佢重話畀我聽星期四會上嚟節目，都唔知有冇搞錯。」
安雅遭林志穎滅口
安雅同林志穎日前喺台灣出席朱延平新片《狼》首映，安雅同林志穎喺戲中扮演兩姊弟，失散多年後重遇，安雅做咗女警，而林志穎因為結識咗壞人而學壞，之後重殺咗安雅。
