《2004城市規劃（修訂）條例》周五終於生效！𠵱家門禁森嚴嘅城市規劃委員會，開會過程未來會大公開。
規劃署署長馮志強話，會議開放畀公眾人士聽，乃係順應大家要增加透明度嘅訴求，但因條例啱啱生效，初時唔係個個會都聽得。好似今個星期五嘅會就唔得嘞。不過下周五就有啲可以聽，不過，涉及個案要商討做決定嘅時候，就唔會即時畀大家睇埋。
噚日規劃署副署長黃婉霜，帶住蘭西一班行家，率先參觀專設嘅旁聽室，成間房可以容納五十人，有兩部plasma，播放唔同角度嘅即場開會過程，又有投影機，專放申請者帶嚟嘅資料。
黃副署話，座位有限，所以想嚟見識吓開會情形，就一定要預訂，先到先得，額滿即止，記者都冇情講。記住，以後逢星期一去訂位啦。
有人換樓冇跌市
今敞息魔威力不容忽視，幾間大證券行，前後腳唱淡樓市，加上內購風波，業內可謂四面受敵，為保飯碗，點都要撐。
美記噚日慶祝上市十周年，黃主席話，樓市唔只唔會跌，重會一路旺到○七年，每年樓價會升一成半。理據係，有好強嘅換樓購買力，而政府政策亦一定會以經濟同樓市為大前提。
有新盤賣緊嘅華置，主席劉鑾鴻亦力撐，話加息對樓市影響輕微，樓價更加唔會好似證券行估計，跌逾兩成咁誇。另外，佢亦贊同提高內購透明度。
中意林岱信德入貨
雖然話近排加息，影響投資情緒，但唔少投資者對後市仍然睇好，入貨意欲不變。好似中意控股副主席林岱，最近就買咗上環信德中心二十一樓○七室，二千五百多呎，作價逾二千萬，每呎七千九百幾。
市場人士話佢向來鍾情全海景寫字樓，今勻第一次踏足信德，諗住自用。
林岱舊年幾度入市都有斬獲，好似遠東金融中心咁，舊年十一月，用八千四買咗三十三樓，呎價七千八，持貨兩個月賺逾千一萬。
海翡翠樓書蝦碌
香港新樓盤樓書愈出愈精美，有時一個盤，三五七本唔同樓書等閒事，但係，蘭西發覺，好多樓書內，經常都有資料小錯誤，雖然無傷大雅，但作為真正用家，對住樓書作幾百萬嘅投資決定，要求資料準確，亦係消費者應有權益。
啱啱賣緊嘅宇晴軒海翡翠，平面圖嘅資料，點解有個單位兩個細房都附設露台嘅？睇清楚英文，明明係B.W.喎，噢，原來係中文字方面執錯字粒，窗台變露台。
其實真係好小嘅事，只怕一般買家會唔會有錯覺，本樓書嘅QC都做得咁差，其他嘢，唔……
電郵地址：[email protected]
