經濟師Ｅ外貌年輕，出鏡時形象甚佳，點知呢日食飯之時，佢話：「我重有一年就退休咯。」成班人唔係幾信，咁早退休做乜嘢呀？經濟師Ｅ說：「機構規定五十五歲退休，冇得例外。」呢啲以前殖民地時代規矩，似已不合時宜。古時英國人千山萬水，嚟到亞熱帶地區或者非洲殖民地，由二十歲出頭做到五十五歲，凡三十有餘年，自覺乜都夠皮，要返祖家安享晚年，所以規定五十五歲退休，一般退休之後十五年內就會去見上帝。但現代人五十五歲退休後，起碼重有二十五年（平均計）至三十年生活，退休生活費好襟計噃。
賓架Ｃ話過，人生有三個二十七，第一個二十七年係成長、學習、結婚期；第二個二十七年係搵錢退休期；第三個二十七年係享受餘生期。如果第一個二十七唔打好基礎，第二個二十七搵唔到錢，第三個二十七就係受氣受難期（要政府養或仔女養，重唔係受氣？），好難捱啫，所以奉勸各位，「少壯不努力，老大徒傷悲」呢句古語，十分現代，唔記住唔得。
財務策劃師Ｔ哥話：「五十五歲甚為年輕，退休有啲可惜，但亦有唔少女士上嚟我公司，問我哋如何策劃，等佢哋可以工作二十年，到四十五歲就退休，之後去環遊世界，做一啲合乎自己真正興趣嘅事。老實講，工作二十年，好難搵夠四十五歲之後生活四十年嘅錢（八十五歲乃女士之平均年齡），除非有一大筆橫財啦，但橫財係冇得策劃嘅噃！」
四十五歲退休？做得到嘅，萬中無一，巨富子弟例外。香港女士平均壽命長，四十五歲退休確實太早，亦係社會之損失。十幾年前左丁山識得一個四十歲退休之人，最初五年生活唔知幾寫意，點知後來碰上十年唔逢一閏嘅投資意外，唔見咗好多錢，重新出嚟打工，得個捱字，都唔知等到幾時先至可以再退休。