雖然大部份人看淡，但大市卻反其道而行，再度向14000關推進。恒指最高13938，逼近月初高位13946，收13898，升61點，成交增至175億元。
睇噚日大市嘅操作，好淡決戰已接近分出勝負時刻，大家都有最後防線，好友係13337，淡友係14339，家吓大市已喺呢個區域內反覆上落咗半年，升穿或跌穿，勝負就分。一直以來，筆者都係做好友，大市應有機會破位而上。
一早話咗大戶要㩒實隻滙控（005），好似噚日，滙控依然紋風不動。不過，就快到期嘅滙控C輪4441就有大異動，最高搶上12.8仙，雖然回收11.5仙，仍大升38.5%，成交更大增到6.2億份，顯然係有心人在大手扯吸。點睇？可能有人認為滙控就快㩒唔住，不如盡快「立」番晒C輪嘅貨源，出多少少溢價亦冇計。若果大戶真係咁諗，則大市嘅升勢可能會提前發動。
供股計劃延遲
國企股升勢已開始擴散，除石油化工股外，金屬股亦已發力，鞍鋼（347）係3隻鋼鐵股中經營條件最好嘅一隻，就算係博反彈，幅度亦算好可觀。鞍鋼收3.85元，升5仙。
鞍鋼上一個大升浪，由去年5月的低位2.025元發動，到今年3月的高位5.20元，共上升3.175元，調整升幅的50%，係3.6125元，近日鞍鋼落到3.625元便回升，中期調整應已完成。
由於A股市場疲弱，鞍鋼已推遲A、H股的供股時間表，有可能在7月才進行。鞍鋼係以10供8的比例，供股價3.15港元，集資收購母公司資產，完成後生產流程將可一體化，整體毛利率可擴大逾倍，由現時的15%去到33%，06年度的每股盈利，最少可提升25%，成個「刁」對鞍鋼好有利。
今年首季，鞍鋼營業額68.6億元人民幣，升55.6%，獲利6.03億元人民幣，升115%，公司更預期今年上半年盈利增50%。去年上半年盈利7.16億元人民幣，增50%即升到11億元人民幣。
05年度（12月年結），估計鞍鋼每股盈利0.85元，以6倍PE計，股價已可見5.10元。06年新收購資產提供全年貢獻，每股盈利可再上升至1.05元。
郭兆誠