米高積遜的狎童案日內裁決，自認是米高超級fans的張智霖表示不相信偶像會性侵犯兒童。而at17則表示雖不知真相如何，但斥責侵犯兒童是殘忍行為。
張智霖（Chilam）、楊恭如和鄧健泓前晚在西營盤出席新劇《香港人在上海之美麗新天地》煞科宴，Chilam表示欣賞過郭富城的演唱會，還大讚精采，他說：「我做咗佢fans呀，要搵個歌手跳舞好似佢咁真係好難。」
幻想遊Neverland
談到舞技亦很精湛的米高積遜（MichaelJackson），其狎童案正在候判，原來Chilam是他的fans，Chilam說：「我信佢冇罪，有朝一日發現件事係冇發生過嘅話，都幾好笑。有啲人為咗錢會好麻木㗎，我希望成件事冇發生過，世界就會更美好。」
Chilam坦言曾幻想到米高的Neverland玩耍，他說：「我細個時幻想過去㗎，我真係好鍾意佢，佢喺舞台上太有魅力啦。」問Chilam會否擔心米高或會入獄，他說：「佢唔坐得監㗎，我怕佢坐監會胡思亂想。」
而Twins和at17昨日在土瓜灣綵排音樂會，問她們對米高狎童案有何看法？at17說：「我哋唔知道法律可唔可以搵到真相，但受害人應該受到保障，侵犯小朋友係好殘忍嘅事。」
而阿Sa說：「我唔喺現場，唔知內情係點，但我覺得無論結果係點，陪審團嘅判決都係公正。」阿嬌則謂：「如果係啲小朋友告佢，咁我哋就要信啲小朋友。」
Rosemary同情
此外，Rosemary昨日在中環出席活動時亦說：「ＭＪ喺某程度上都係個受害者，佢咁受人注目，好大壓力，其實佢嘅case同多次整容事件已經好羞家，我諗佢係鍾意小朋友，可能啲報道誇張咗。」
採訪：胡比、魯萍
攝影：仇志德
