旺角的這家老酒家，以賣傳統順德菜聞名，但熟悉這裏的人都會知道，這間店，人情味最濃。老闆似慈父，員工亦有情有義，這種充滿溫情的互動關係，相信至今也僅能在傳統老店中找得到。
記者：尹珊珊
攝影：何家亮
慈父型
鳳城酒家的歷史可追溯至1954年，旺角店84年開業，一直由人稱師叔的譚國景打理。訪問前，跟他提及要找老員工訪問，結果，一張大枱也不夠坐，「入得來做，好少會走，𠵱家近六十個員工，好多都係由開舖做起。」師叔說到跟老臣子的感情，一臉驕傲：「我哋重人情味，呢點連鎖店一定做唔到，新一代的管理是讀書讀出來的，我哋舊派的是用心來管理。」
唔識乜叫管理
問師叔管理哲學，他搖搖頭道，「好慚愧，做咗咁多年，真係唔識乜叫管理，我一直都當佢哋係子姪，真係要講，咪我識做囉！」反觀身旁的員工比他更肉緊，七嘴八舌爭相發言：「師叔唔係含金鎖匙出生，佢由紅褲仔做起，會將心比己，為我們設想。」「佢唔會擺架子。」「佢平日會同我哋同枱食飯，又不時會斬料加菜。」
自動減薪度難關
老闆視員工為子姪，做員工的，亦有情有義，沙士期間，飲食業陷入困境，這裏的員工就自動要求減薪。「當時班員工主動問是否需要減薪，結果全體減了2成人工。」落實減薪，員工一致贊成，點心部大佬林補充：「嗰時師叔講過，有工開、有飯開，點都唔會裁員，只要求我哋保持水準。」捱了一個月，鳳城的生意奇迹地重上軌道，師叔即時加回各人的人工。結束這次歷史性減薪事件，敏姐至今仍記得當時的興奮場面：「師叔一講話危機度過，大家即時大叫師叔好嘢，嗰刻覺得士氣真係好緊要。」
鳳城係我哋媒人！
鳳城多年來也造就過不少夫婦檔，君哥和小萍便是一對。他們結婚時也在這裏擺酒，不過是收工後才擺午夜場。
爆炸頭與地中海
經理敏姐和安哥都是旺角店的開國功臣，敏姐當年的經典爆炸頭，跟安哥今日髮線上移的典型中年人模樣相映成趣，見證了他們在鳳城的歲月。
師叔溫情3招
1.營造歸屬感
「過年一定休到初四，好唔好景都有一個月獎金，等佢哋過肥年，又可以陪吓屋企人。」
2.重視員工感受
「每個人個性唔同，有啲鍾意駁吓嘴，聽完就算，唔使執着，做錯時最多提點吓。」
3.提供升職機會
「唔係話走咗個經理，就要喺出面請番個人，寧願喺內部調配人手，員工都會服氣啲。」
嚴父式
夜歸會等門
若說鳳城酒家的譚國景似慈父，對一眾陳意齋的員工來說，已故的老事頭可用嚴父來形容。這間懷舊零食店由陳老先生於1927年創立，任職近27年的端哥回憶道：「老事頭用家長式管理方法係嚴少少，佢好注重夥計的儀容，天熱都要我哋着長袖衫㗎！」今時今日，他仍堅持外表執到正的作風。
寫字有獎
任職了逾50年的秋叔直言：「相處好先可以做咁耐。」秋叔由少年做到老，「老事頭對我哋好好，唯一係唔鍾意我哋出夜街囉！」當年秋叔最愛在放工後到樂聲、利舞台睇戲，又會到大笪地逛，「老事頭怕我哋會學壞，鼓勵我哋練字，那時我哋用毛筆寫一張『朱子治家格言』，就會有5毫當獎賞，嗰陣食碗雲吞麵都係3毫咋！」
去希爾頓食香蕉船
「老事頭最鍾意食。」輝哥40年前在陳意齋當學徒，回憶也離不開食。「老事頭收工會帶我哋去希爾頓食香蕉船！見我哋頭髮長會畀$10我哋去飛髮，相等於我成兩日半人工㗎！不過就一定唔可以夜返，老事頭會好似嚴父咁，坐喺度等門！」也許，說自由及不上一般打工仔，但最重要是那份如家人般的關係，還是只限老店才找得到。
水池裏，住了一隻喜愛啄食蓮花的天鵝。一夜，滿天繁星，星星映在池面，很像朵朵蓮花，天鵝就在池裏啄這些星星的影子。啄了一夜，甚麼也沒啄到，牠非常灰心。第二天，池裏真的開滿了白蓮花，但天鵝卻以為仍是昨夜星影，不再啄食。就因為被騙過，便連真的也懷疑，比單純的被騙還糟。（互聯網）