恒指進帳61點，總彩池175億元，增61億元。有成交配合，恒指可向萬四關挺進，揀落後藍籌，向佢哋嘅C輪埋手，搵銀之道。
滙控C輪4875：滙控（005）原地踏步，企定喺124元。但八十幾隻C輪，只有兩隻下跌，跌幅輕微，其餘皆升或無變動，當中槓桿率勁大嘅4441與3791，同升39%。傳統智慧，正股未動，窩輪先行，跟住落嚟，大概係滙控追落後。滙控前日成356萬股，昨日成1576萬股，追落後睇落有迹可尋。
末日輪風險高，回報亦係，食得羊肉唔怕羶，炒末日輪記得執生。穩陣少少嘅做法，敲4875，隻輪昨日只係爬高1格，上車冇咁蝕章。隻輪年底到期，輪價36仙，溢價3.7%，槓桿率34.4倍（有效16.3倍），引伸波幅11.4%，唔怕散水難，有101球易手。
中石化C輪4561：中石化（386）升7.5仙，最勁嘅3隻C輪升幅34%至45%，屬交投低、槓桿率高嗰批。
中石化C輪4561升得6%，交投最勁，最博得過。隻輪9月尾夠鐘，輪價10.3仙，溢價6.1%，槓桿率28.4倍（有效12.1倍），引伸波幅22%。其他同類輪急升，好快輪到佢領領風騷。
章盛