中國證監會前日批准內地公司回購股份救市，但深滬股市當日冇厘反應，噚日則勁升逾8%，是3年來最大單日升幅。有消息話，中央財金官員會見咗一批芬佬，叫佢哋唔好沽貨，重話中央會繼續支持股市，千億元的救市基金已有數百億元入市。真係信唔信由你？阿虎隨即諗起當年港府撼大鱷時，約莫在恒指8000水平接咗1200億元股票，由於貨源歸邊，導致基金大舉補倉，將恒指挾上18000水平。
若然A股真係出現大挾倉，唔知H股又會否受惠呢？噚日國企指數升0.98%至4712，反應唔算好勁。Cookie話，若果A股轉勢，中資隨時調資金回國炒A股，屆時H股可能反而受壓。
神華（1088）以每股7.50元接近下限定價，公開發售獲15-16倍超購，雖然較市場預期為差，但總算不過不失，最重要係冇拖累交行（3328)，市傳交銀保薦人之一高盛已經收夠飛，不會再向分銷商或基金派貨。黑客話，睇形勢，交行認購肯定超理想，拆息一定被抽高，屆時港股又受息魔困擾。
慧峯有新消息炒高
慧峯（8228）旗下中港電力多人吼，其拍檔中國電力國際的母公司同國內南方電網傾緊供電香港，有可能共同投資於中港電力。若果事成，中港電力的股東組合實力更加雄厚，對中電（002）與港燈（006）的威脅絕非講笑。慧峯有新炒作藉口，再升7.5%至0.57元。
大馬前首相馬哈蒂爾揚言要限制中國汽車進口，消息或對汽車股照計有影響，特別是剛簽訂協議向大馬出口汽車的吉利汽車（175)，不過該股噚日冇起跌，股價平收0.50元。
阿虎