試問有邊個估到，球王比利個仔艾甸奴涉嫌係販毒集團一分子？佢重同綁架巴西球星羅賓奴母親案扯上關係㖭。唉，昔年響綠茵場上萬夫莫敵嘅世紀球王，前日去羈留所探完個仔後老淚縱橫，慨歎為工作無好好教個仔。家家有本難念的經，球壇名宿嘅生活表面風光，其實內裏嘅悲凉，有誰共鳴！
唔止比利，其他名宿好似佐治貝斯、告魯夫、碧根鮑華同埋馬勒當拿唔係老咗健康唔多妥，就係私德或者家庭有問題；當你以羨慕眼光睇一代名將後人咩，結果有人要承受名將之後嘅巨大壓力、有人作奸犯科，又有人成年後至認得番個老竇……。
講開比利，喺一九七○年同佢一齊捧世界盃嘅隊長阿爾拔圖亦慘，佢帶領嘅阿塞拜疆國家隊上周六吞波蘭三蛋後，日前俾足總炒魷，又係一個踢而優則教，但最終要食無情雞嘅故事。
圖圖盃食得唔好嘥拉素現今墮落真慘情
圖圖盃無錯係進軍歐洲嘅出路，但參賽隊嘅球季因而拉長，令人嗤之以鼻，連意甲利禾奴呢啲細球會都唔吼，偏偏拉素就決定走呢個後門，賺得幾多就幾多。換轉以前，呢支首都名牌隊肯定唔放呢個盃仔在眼內，家吓球員要七月頭歸隊準備，七月中開波，假期縮短，都咪話唔慘。
剛簽耶高保點知發舊病米堡傷兵營星光熠熠
米杜士堡呢兩年唔知係咪無乜買球員運氣，上季邀得維杜卡加盟，可惜呢位澳洲前鋒，全季大部份時間都係用嚟養傷；最近為下季組軍作準備而簽入嘅另一位超聯射手耶高保，近日亦證實幾年前已患上過嘅瘧疾舊病復發。連埋仍然養緊傷嘅文迪達，米堡個長期傷兵陣都幾星光熠熠。
新班主大改革曼聯變天紅魔鬼隨時變黑天使
曼聯已經唔屬於英國人呢個事實，已經俾球迷逐漸接受咗；日前新班主格拉沙宣布三個仔加入董事局，咁就標誌住曼聯進入格拉沙時代。聽聞佢下一步可能改埋曼聯嘅會徽同球衣顏色，如果最後紅魔鬼真係變成黑天使，我求大俠都替格拉沙擔心，到時候恐怕佢請多幾個保鑣穩陣啲。
逢周一至周五見報