本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線會由「1823政府熱線」職員接聽。
老婆：今個月嘅家用呢？
老公：公司未出糧呀，下個月實有喇。
老婆：下個月又下個月，都拖咗幾個月未出糧喇！
老公：老闆話啲資金一時周轉唔嚟，下個月會搞掂。
老婆：哎！咁唔係辦法噃，我唔食亞仔都要食㗎！
老公：咁唔通唔做咩？我喺公司做咗六年啦，自己辭職，乜都冇得賠㗎！
老婆：唔係呀，《僱傭條例》講明，僱主最遲要喺工資期滿後七日內出糧畀僱員。僱主如果無能力出糧，就須要立即根據僱傭合約規定，終止大家嘅合約。
重有，僱員如果超過一個月都未獲發所有到期工資，可以當佢嘅僱傭合約已經被終止。喺呢個情況下，僱主須要支付畀僱員解僱代通知金同埋其他解僱賠償。
老公：咁你話我𠵱家應該點做好呀？
老婆：勞工處都時時提醒啲打工仔，如果遇到僱主拖欠薪金，要立即向勞資關係科求助，千祈唔好拖。所以，你第一件事應該係去勞工處勞資關係科分區辦事處，就住你嘅情況，問吓主任意見。佢會為你同僱主安排調解會議，幫你調解勞資糾紛。
老公：好，我一於去搵勞工處問吓先。
以上資料只用作說明《僱傭條例》的相關條文，對於法例的詮釋，應以《僱傭條例》為依據，如有爭議，則以法院判決為最後依據。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]