趙薇同汪道涵愛子汪雨拍拖一年多，但緋聞一直未停過，上年趙薇曾經同內地造型師易茗傳出曖昧關係，到最近再傳音樂製作人陳偉為佢嘅專輯作四首歌後，趙薇對佢產生好感，不時以追魂call傳情，之後又傳趙薇一腳踏兩腳，近日重傳佢同汪雨情變㖭。
趙薇為咗拍唱片封套同MV，日前秘密嚟咗香港，噚日朝早十點幾，趙薇離開銅鑼灣某酒店，去到附近嘅印尼移民局辦理簽證，逗留咗大半個鐘，之後就上咗保母車，到柴灣一間影樓影相。
示範一心兩用
其間趙薇一邊講電話，一邊答記者問題，即席示範「一心兩用」，趙薇話佢打算去印尼，所以搞簽證喎。而經理人陳蓉噚日被問到趙薇係咪同汪雨情變時，就話關於感情嘅嘢唔好問。再問陳蓉趙薇同汪雨𠵱家嘅關係係咪朋友？陳蓉只係答應該係。不過陳蓉講起陳偉時就從容得多，佢話呢單緋聞一睇就知係流嘅。
趙薇到夜晚八點幾收工時，被記者問到佢係咪同汪雨分手時，佢只係笑住答：「現階段沒有問題。」之後佢就去咗銅鑼灣嘅寧記歎麻辣火鍋。
阿嬌台灣被唱衰
女子組合Twins上月底曾經取消台灣桃園嘅簽唱會，噚日有台灣報道話幫Twins喺台灣發行唱片嘅時尚唱片公司宣傳人員，竟然打電話畀fans唱衰Twins，話嗰日取消活動係阿嬌鍾欣桐懶床引起，但fans就覺得有人咁講好唔啱，要求英皇同時尚終止合作關係，但英皇高層霍汶希就強調係誤會。
鄭裕玲整容要揀好醫生
鄭裕玲噚日接受王喜主持嘅《Roadshow紅人館》訪問，嘟嘟睇咗有女子做咗隆胸手術後爆胸嘅新聞，佢話整容要好小心，最緊要搵個好醫生，嘟嘟話：「做整容手術一定有風險，唔會十全十美。」嘟嘟重話外表只係人嘅一部份，內涵最重要。
奇洛李維斯傳同舊愛結婚
荷李活萬人迷奇洛李維斯（KeanuReeves），啱啱俾外國小報傳佢已經喺上個月同多年前嘅舊愛AutumnMacintosh秘密結婚，重同家人喺洛杉磯一間小型餐廳低調慶祝。不過，日前奇洛先俾人影到同另一位舊愛AmandaDeCadenet秘密約會，睇嚟佢結婚嘅消息都唔係太可信。
林志玲批死對頭嫁洋漢
台灣兩大名模林志玲同林嘉綺噚日喺台灣出席《安麒粉紅幫》記者會，早前傳佢哋不和，現場所見，佢哋喺台上冇乜偈傾，不過林志玲幫林嘉綺算命，佢話：「她一定會閃電結婚，而且會嫁給外國人。林嘉綺其實很洋派，談起戀愛就會『完了』。」事後林嘉綺直率地話：「感情好不好我們倆自己知道就行了。我和志玲沒有不合，私下都會互相打氣。」
