熱刺畀車路士撬走足球總監晏尼臣嘅事件，至目前為止熱刺方面重未正式向聯賽會或足總等作出投訴；照睇佢哋應該都係想同車路士「枱底交易」，要求對方畀番筆賠償費，甚至有報道話用晏尼臣交換對方嘅中場柏加及前鋒科素，以令他們打消告上超聯賽會。
柏加科素為交換籌碼
如果柏加同科素真係喺呢次事件上，做咗「車仔」為買晏尼臣所用嘅交換籌碼，佢兩位如果唔想去熱刺落班就固然委屈；今季成功打入聯賽前四名、贏得來季歐冠盃資格嘅愛華頓就重慘。
事關柏加及科素兩人早成愛華頓組軍目標，點知𠵱家車路士搞到熱刺，要搵嘢賠番畀人；偏偏熱刺就係睇中呢兩件，來季準備穿上另一件藍色戰衣比賽嘅愛華頓目標。
我求大俠覺得愛華頓𠵱家嘅處境，就好似同柏加及科素係一對相互傾慕嘅愛侶；殊不知兩人「老竇」車路士，為咗冧掂熱刺呢個拍檔，夾硬將柏加及科素許配畀對方，愛華頓就做咗一個失戀青年！
朴智星被紅魔睇中
車仔又做狙擊手？
燕豪芬日前證實畀陣中嘅南韓國腳中場朴智星同曼聯斟轉會，如果事成，「星仔」嘅足球事業將可更上一層樓，而且幫南韓足球威番次㖭。話時話，啱啱同某大南韓電子商簽咗份巨額贊助合約嘅車路士，唔知會唔會出嚟搞搞震，利用佢哋同燕豪芬同南韓嘅關係而截曼聯胡呢？
信晒新教練侯利亞
里昂簽死艾辛留後路
話過想過檔車路士嘅加納中場艾辛日前話會同里昂續約至○九年。照咁睇身價達一千五百萬鎊嘅佢對里昂新教練侯利亞幾有信心，認為球隊喺下屆可繼續有好表現。但換個角度嚟睇，如果佢下屆再踢好啲，幫隊波攞到歐冠盃，里昂可將個價再叫高啲，隨時去到二千萬鎊。
入場睇波要查身份證
意國治亂世落重藥
意大利政府為打擊球場暴力，將要求所有球迷入場都要查身份證，重要對號入座。冇錯，咁樣會有效打擊滋事分子及黃牛飛等問題㖭。但係我求大俠就質疑有冇必要將球迷都當「賊」辦呢？需知道𠵱家意大利球市萎縮，意大利政府今勻落藥咁重，會唔會搞到球場一個人都冇呢？