被譽為「時裝界奧斯卡」嘅美國時裝設計師公會○五年度頒獎禮，前日喺紐約公共圖書館舉行。當日唔少著名設計師同時裝界名人都盛裝出席，衣香鬢影。近年養尊處優嘅加拿大名模LindaEvangelista、英國名模姬蒂摩絲（KateMoss）以至腹大便便嘅德國名模HeidiKlum亦帶同歌手丈夫Seal撐場，真係畀面。
每件衫均具含意
喺當晚嘅頒獎禮中，較為矚目嘅「時裝影響力大獎」，就落喺姬蒂摩絲身上，美國時裝設計師公會執行總監大讚姬蒂影響全球女士着衫之道，佢話：「佢每次演繹一套衫，都代表特別含意，佢着過嘅嘢，其他女士都會跟隨，而且佢從來唔使服裝指導。」
至於美籍華裔設計師VeraWang力壓MarcJacobs同RalphRucci等設計師，獲得「全年最佳女裝設計師」，而「全年最佳男裝設計師」就由JohnVaratos奪得，MarcJacobs就第三度贏出「最佳配飾設計師」，出道超過三十年嘅DianeVonFurstenberg就攞到「終身成就獎」。
