月入一萬，用七千蚊買個LV袋，一心以為佢夠晒保值，拎完去威威又可以換番做錢，幾爽！但係相信你估都估唔到呢個原價七千的LV袋若然拎到去傳統的當舖試舉，結果係一蚊都唔值！唔止LV，一大堆𠵱家勁炒的潮物，通通拎去當舖都唔值錢。如果你等錢周轉，但又唔想賣斷自己件心愛舉貨，就一定要熟讀呢個「舉貨排行榜」！
記者：黃藹瑩
攝影：陳盛臣
Models：Angus、Sony（Salvador）
試舉潮貨：一蚊都唔值！
第1擊
LVReporter袋
專門店售價：$5,600
二手回收價：$3,800
當舖收價：$0唔收！
第2擊
千葉徹彌親筆簽名矢吹丈
12吋Figure公仔
一手價：$880
炒價：約$2,000
當舖收價：唔收！
當舖阿叔回應：笑笑口都係話唔收！
第3擊
潮鞋MADFOOT
一手價：$1,250
當舖收價：唔收！
當舖阿叔回應：衫褲鞋襪我哋全部唔收，唔好意思！
古老行業：四個月無回頭
當舖註解：當舖即是從前的所謂「二叔公」，喺未有信用卡或財務公司之前，需要金錢應急的人，就會拎衫、鞋、棉被、米、金呢啲物品，到大押舉貨套現。𠵱家當舖則視乎市場需要，主要肯收金飾、手表、鑽石、名牌筆、名牌火機，近期轉收手機同相機。
舉貨須知：根據法例規定，抵押品最少要存放在當舖四個月或以上，而客人在贖回抵押品時除了要清還本金外，還要支付3至4厘月息。當抵押品在四個月後仍未有人贖回，當舖通常會把物品交由有連繫的二手商店發售。
當舖架構：
櫃面：要有3年以上當舖工作經驗
幫櫃：最少要有1年半的當舖工作經驗
學師：冇特別的入行條件，一句講晒就係一定要有熟人介紹，當舖入面嘅所有員工都係老闆嘅親朋戚友，外人想入行都幾難！
賓賓客仔變主流
除咗本地香港人，其實好多外傭都係當舖嘅常客，阿敬話外傭當中又以菲傭最多。香港人總會認為外傭拎去當嘅嘢一定係喺主人度偷出嚟，見到外傭入當舖就認定唔會係好事，但其實都只係一個誤會。阿敬話：「一般佢哋都係攞啲金器同首飾之類嚟當，每次都係逐件逐件當，唔會話一次過有大量拎嚟，四個月之後佢哋一定會嚟贖番。」
菲傭套現為幫人
一般嚟講，啲菲傭拎嘢去當都離唔開兩個原因，一個係家鄉屋企有難，另一個係自己的朋友有難，佢哋都會義不容辭。
Amy（菲傭）
「菲律賓嗰邊屋企唔夠錢使，屋企人有病，要多啲錢嚟睇醫生，我一個月嘅人工係得咁多就咁多，所以唔夠咪攞條金鏈去當，條鏈都當到700蚊，好過冇啦！」
Natasha（菲傭）
「我有個朋友需要錢，自己都諗住要多少少錢嚟買嘢寄返屋企。頭先當咗條18K金手鏈，當到500幾蚊，要4個月之後先有得攞番。」
今期潮舉：數碼相機最值錢！
不願上鏡的當舖幫櫃阿敬，話今期最潮的當物依次為數碼相機、手機同Notebook！阿敬話呢幾年多咗人拎數碼相機嚟當，「我哋行內人都認為Canon係數碼相機中的名牌，多款之餘又多人用，二手市場比較有市，我哋都會肯出高啲價畀個客。」至於手機，「視乎二手市場，同埋轉手賣到幾多錢。Nokia二手價可以賣到較高價錢，所以最值錢。」順帶一提，家陣的3G手機未必間間當舖都會收，因為好多當舖都冇卡Check部機。
No.1數碼相機
No.2手提電話
No.3手提電腦
你有冇幫襯？
Melon
「我冇諗過去當舖喎，一來唔識點樣當，二來我都冇值錢嘢去當。」
趙小姐
「如果俾我拎嘢去當我會拎部MP3試吓，因為MP3都唔係啲重要嘢。」
